०९ असार २०८३, मंगलबार
हनिमून मनाउन निकै उत्साहित हुँदै होटलमा पुगेको जोडी तब उही दिन छुट्टिने मोडमा पुग्छ, जब श्रीमतीको मोबाइलमा म्यासेजको घण्टी बज्छ ।
म्यासेज गरेका हुन्छन्, उनका पूर्वप्रेमीले । श्रीमानले कसको 'म्यासेज हो ? भनेर सोध्छन् । जवाफ आउँछ– 'मेरो एक्स'को ।
बन्द कोठाभित्र प्रेमिल संवादमा रहेको जोडी एकाएक तनावपूर्ण अवस्थामा पुग्छ । तनाव बढ्दै जाँदा कुरा 'भर्जिनिटी'सम्म पुग्छ ।
आना (प्रतिभा केसी)लाई उनका पति (विशाल कटुवाल)ले तिमी भर्जिन त छौ ? भनेर सोध्छन् ।
आफू भर्जिन नरहेको प्रस्ट संकेत गर्दै आनाले आफ्ना पतिलाई पनि त्यही प्रश्न फर्काउँछिन् ।
त्यसपछि पतिले के जवाफ दिन्छन् ? उनीहरूको सम्बन्ध के हुन्छ ? त्यो कुरा जान्न भने पत्रकार तथा निर्देशक रामजी ज्ञवालीद्वारा निर्देशित शर्ट मूभी हनिमूनका लागि १६ मिनेट ४३ सेकेन्ड समय छुट्याउनुपर्ने हुन्छ ।
उक्त शर्ट मूभी राम्रो इन्टरटेनमेन्ट नामक युट्युब च्यानलमा उपलब्ध भइसकेको छ ।
यस शर्ट मूभीमार्फत रामजीले नेपाली पुरातन मान्यता र पछिल्लो समयका युवायुवतीको मनोविज्ञानलाई निकै कलात्मक ढंगले चित्रण गरेका छन् ।
आफू विवाहअघि कुनै युवतीसँग सम्बन्धमा रहनुलाई गर्वको विषयका रूपमा लिने तर, श्रीमतीको त्यही कुरा सुन्न नसक्ने युवकहरूको मनोविज्ञानमा पूरा पटकथा तयार भएको छ ।
धनी परिवार भन्दैमा केटाबारे कुनै सोधखोज नगर्ने र आफ्नी छोरीको इच्छाचाहना समेत नबुझ्ने बाउआमालाई पनि छोटो समयमा दमदार व्यंग्य गरिएको छ ।
हरेक व्यक्तिसँग आ-आफ्नो विगत हुन्छ, तर विगतका तीतामीठा क्षणलाई भुलेर अगाडि बढ्नुपर्छ भन्ने सन्देश दिएको हनिमून औसत शर्ट मूभीभन्दा निकै अब्बल छ ।
पतिका रूपमा विशालले दमदार अभिनय गरेका छन् भने पहिलो पटक शर्ट मूभीमा देखिएकी प्रतिभाको अभिनयलाई पनि राम्रै मान्न सकिन्छ ।
सबैभन्दा माथि यसको कथा, यसले दिने सन्देश र निर्देशनलाई नै क्रेडिट जान्छ ।
झण्डै १७ मिनेट खर्चिँदा तपाईंले समय खेर गएको महशुस गर्नुहुने छैन ।
