०५ साउन २०८३, मंगलबार
गत माघ २९ गते भाँचिएको मकालु गाउँपालिका १ र ५ जोड्ने अरुण नदीको पुल पुनर्निर्माण नहुँदा स्थानीयले सास्ती पाएका छन् ।
नदी वारि र पारि तर्ने विकल्पसमेत नहुँदा आवत जावतमा समस्या परेको छ ।
नदी पार गर्न पुल भत्किएको क्षेत्रमा वैकल्पिक व्यवस्थासमेत नहुँदा गाउँपालिकाको केन्द्रसम्म आउन समस्या रहेको स्थानीय बताउँछन् ।
मकालु गाउँपालिका–५ नुम बजारमा रहेको गाउँपालिकाको केन्द्रसम्म आउन नहुँदा समस्यामा परेको नागरिकको दुखेसो छ ।
विभिन्न योजना तथा कार्यक्रम सम्झौता र सञ्चालन गर्ने समय भए पनि पालिकाको केन्द्र पुग्नै समस्या भएको मकालु गाउँपालिका–१ का चुनबहादुर राईको भनाइ छ ।
प्रत्येक आर्थिक वर्षको दोस्रो र तेस्रो चौमासिकलाई विकास अवधिका रूपमा नागरिकले लिने गरेका छन् ।
अरुण नदीको पुल भत्किदा विकास निर्माणका लागि आवश्यक सामग्री गाउँसम्म लैजान समस्या भएको उपभोक्ता समितिहरूको भनाइ छ ।
सिमेन्ट, ईट्टा, रडजस्ता सामग्री ल्याउन नसक्दा विभिन्न योजनाका काम रोकिएको मकालु गाउँपालिका–१ का वडाध्यक्ष वाङ्दी शेर्पाले बताए । सवारी चालकको लापरवाहीले पुलमा क्षति पुगेपछि दुःख पाएको वडाध्यक्ष शेर्पाको भनाइ छ । गोरखापत्र दैनिकमा खबर छ ।
