विवादको भुमरीमा परेको अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी) सम्झौता अनुमोदनका लागि मध्यमार्गी विकल्प खोज्न सत्ता गठबन्धनको बैठक बालुवाटारमा शुरू भएको छ । 

प्रतिनिधि सभा बैठकमा एमसीसी सम्झौतामाथि छलफल हुनुपूर्व आइतवार गठबन्धनको बैठक बालुवाटारमा बसेको हो ।

यसअघि एमसीसीको विपक्षमा मतदान गर्ने निर्णय गरिसकेको माओवादी केन्द्रले गठबन्धन जोगाउन केही वैकल्पिक र मध्यमार्गी प्रस्ताव खोज्ने बताएको छ । 

बैठकमा प्रधानमन्त्री एवं नेपाली कांग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल प्रचण्ड र नेकपा एकीकृत समाजवादीका अध्यक्ष माधव नेपाल लगायत सहभागी छन् ।

गत साता कांग्रेस महामन्त्री गगन थापाले राखेको पूरक संकल्प प्रस्ताव पारित गरेर एमसीसी अगाडि बढाउने विकल्पमा दलहरूबीच छलफल शुरू भएको छ । 

प्रमुख प्रतिपक्षी दल नेकपा एमालेलाई एमसीसीको पक्षमा मतदान गराउन प्रधानमन्त्री देउवाले गरेको प्रयास सफल हुन नसकेपछि गठबन्धनमै छलफल हुन लागेको हो ।

यसअघि विपक्षमा मतदान गर्ने बताएका नेकपा माओवादी र नेकपा एसले एमसीसी निर्णयार्थ पेश गर्ने बेलामा संसद् बहिस्कार गरेर पास पास गर्न सहजीकरण गर्ने सम्भावना रहेको स्रोतले बतायो । 

संसदमा आज एमसीसीमाथि विचार गरियोस् भन्ने प्रस्ताव पेश गर्ने र त्यसमाथि सैद्धान्तिक छलफल गर्ने सम्भावित कार्यसूची छ । 

अमेरिकाले एमसीसी अनुमोदन गर्न दिएको फेब्रुअरी २८ को समयसीमा भोलि अर्थात् फागुन १६ गते सकिँदैछ ।