०९ असार २०८३, मंगलबार
व्याख्यात्मक टिप्पणी सहित एमसीसी अनुमोदन गर्ने माओवादी केन्द्रको निर्णयमा केही नेताहरु असहमत भएका छन् ।
पार्टी अध्यक्ष पुष्पकमल दाहाल 'प्रचण्ड'को निवासमा आज विहान बसेको शीर्ष नेताहरूको बैठकले व्याख्यात्मक टिप्पणी सहित संसदबाट एमसीसी अनुमोदन गर्ने निर्णय गरेको थियो ।
तर, उक्त निर्णयमा नेताहरु लीलामणि पोखरेल, हरिबोल गजुरेल, देवगुरूङ लगायत नेताहरुले असहमति राखेका छन् ।
केन्द्रीय सदस्य समेत रहेका नेता लीलामणि पोखरेलले एमसीसी अनुमोदन गर्ने निर्णयमा सहमत हुन नसक्ने लोकान्तरसँग बताए ।
‘व्याख्यात्मक टिप्पणी सहित एमसीसी अनुमोदन गर्ने भन्ने कुराको कुनै अर्थ छैन । पार्टीको यसअघिको निर्णयको पक्षमा छौं’, पोखरेलले भने ।
नेकपा माओवादी केन्द्रको संसदीय दलको बैठकले पनि यथास्थितिमा एमसीसी अनुमोदन हुन नसक्ने र विपक्षमा मतदान गर्ने निर्णय गरेको थियो ।
माओवादी केन्द्रका कतिपय नेताहरु एमसीसीको विपक्षमा सडक प्रदर्शनमा छन् ।
