२४ जेठ २०८३, आइतबार
संयुक्त राष्ट्रसङ्घले रुसबाट युक्रेनमाथि भएको आक्रमणको निन्दा र उक्त आक्रमण तत्काल अन्त्य गरिनुपर्ने प्रस्ताव पारित गरेको छ ।
संयुक्त राष्ट्रसङ्घको आपत्कालीन महासभाले बुधबार राति सो प्रस्ताव पारित गरेको हो ।
संयुक्त राष्ट्रसङ्घले एक वक्तव्य जारी गर्दै संसारकै टाउन हल भनेर चिनिने महासभामा १९३ देशको यो आवाज रहेको जनाएको छ ।
जसमध्ये १४१ देशले युक्रेनको द्वन्द्व अन्त्यको प्रस्तावको पक्षमा मतदान गरेका थिए ।
प्रस्ताव पारित भएसँगै युक्रेनी सार्वभौमसत्ता, स्वतन्त्रता र क्षेत्रीय अखण्डताको पुष्टि गरेको संयुक्त राष्ट्रसङ्घले औँल्याएको छ ।
नेपालले आपत्कालीन महासभामा प्रस्तुत प्रस्तावका पक्षमा मतदान गरेको छ ।
नेपालसहित १४१ सदस्य राष्ट्रले प्रस्तावको पक्षमा मतदान गरेका थिए ।
नेपालका छिमेकी मुलुक भारत र चीनलगायत ३५ राष्ट्र भने मतदानमा अनुपस्थित रहेका थिए ।
प्रस्तावमा संयुक्त राष्ट्रसङ्घको बडापत्रको धारा २(४)विपरीत रुसले युक्रेनमाथि आक्रमण गरेकाले त्यसको निन्दा गरिएको छ ।
साथै रुसले युक्रेन माथिको आक्रमण तत्काल बन्द गर्नुपर्ने भन्दै संयुक्त राष्ट्रसङ्घका सदस्य राष्ट्रविरुद्ध गैरकानुनी रूपमा बल प्रयोग गर्न नपाइने प्रस्तावमा उल्लेख गरिएको खबर गोरखापत्र दैनिकमा चाँदनी हमालले लेखेकी छन् ।
