२७ जेठ २०८३, बुधबार
नेकपा माओवादी समाजवादीका नेता कर्णजीत बुढाथोकीले अमेरिकी आर्थिक सामाजिक कार्यक्रम एमसीसी पारित गरेर माओवादी केन्द्रका अध्यक्ष प्रचण्ड राष्ट्रिय गद्दार बनेको आरोप लगाएका छन् ।
उनले एमसीसीविरुद्ध नेपालमा आन्दोलनको सुनामी ल्याउने चेतावनी दिए ।
एमसीसी खारेजीको माग गर्दै ६ वामपन्थी दलले शुक्रवार काठमाडौंमा आयोजना गरेको कार्यक्रममा बुढाथोकीले प्रचण्डले कांग्रेससँग आत्मसमर्पण गरेको आरोप लगाएका हुन् ।
‘हुन त तपाईंसँग जनयुद्ध लडेको नेतालाई केही भन्न उकुसमुकुस भएको छ, प्रचण्ड तपाईं राष्ट्रिय गद्दार हुनुभयो,’ बुढाथोकीले भने, ‘प्रचण्ड र माधव नेपालले कांग्रेसका सामु आत्मसमर्पण गर्नुभयो । तपाईंहरू लाचार र कम्युनिस्टविरोधी हो ।’
बुढाथोकीले एमसीसी नेपालमा कम्युनिस्ट मास्ने अभियान भएको दाबी गर्दै खारेजीका लागि वडा–वडामा ब्यारेक बनाउनुपर्ने टिप्पणी गरे । उनले एमसीसी पास गर्नेहरू राष्ट्रिय गद्दार भन्दै भिसा लगाएर अमेरिका जान चेतावनी दिए ।
