नेकपा माओवादी केन्द्रको केन्द्रीय समिति बैठक आइतबार पनि बस्दैछ । शुक्रबार अध्यक्ष प्रच्ण्ड र नेता नारायणकाजी श्रेष्ठले सम्बोधन गरेपछि स्थगित भएको बैठक आइतबार फेरि राष्ट्रिय सभागृहमा बिहान ११ बजे बस्न लागेको हो । 
पहिलो दिन अध्यक्ष प्रचण्डले पार्टी संगठनका साथै वर्तमान राजनीतिक समसामयिक विषयमा ब्रिफिङ गरेका थिए । यस्तै अर्का नेता नारायणकाजी श्रेष्ठले आफ्नो धारणा राखेर बैठक समापन भएको हो । 

पहिलो दिनको बैठकमा अध्यक्ष प्रचण्डले एमसीसी, गठबन्धन सरकार, स्थानीय चुनाव लगायतका विषयमा ब्रिफिङ गरेका थिए । 

आइतबारको बैठकमा संगठनात्मक विषयमाथि छलफल हुनेछ । जसअनुसार केन्द्रीय समितिमा सदस्य थप्ने, पोलिटब्युरो, स्थायी र  पदाधिकारी चयनबारे छलफल हुनेछ । 
यस्तै कार्यविभाजन, स्थानीय तह निर्वाचनको तयारी र विविध विषयमाथि पनि छलफल हुनेछ ।