नेकपा एकीकृत समाजवादी पार्टी आगामी वैशाखमा तय भएको स्थानीय तह निर्वाचनमा होमिएको छ । सोमबार बसेको पोलिटब्युरो बैठकले पार्टीका सम्पूर्ण शक्ति चुनावमा होमिने निर्णय गरेको हो । 
बैठकपछि महासचिव वेदुराम भुसालले जारी गरेको विज्ञप्तिमा पार्टीको सम्पूर्ण शक्तिलाई उत्साहका साथ क्रियाशील हुन, आफूहरुले प्राप्त गरेका उपलब्धिहरूमाथि गौरव गर्न र सम्पूर्ण पार्टी पङ्क्तिलाई आसन्न स्थानीय तहको निर्वाचनमा परिचालित हुन आह्वान गरिएको उल्लेख छ । 
 
अध्यक्ष माधवकुमार नेपालको अध्यक्षतामा सम्पन्न बैठकमा नेपालले पार्टी पुनर्गठनदेखि हालसम्मका संगठनात्मक कामहरुको समीक्षा, वर्तमान राष्ट्रिय राजनीतिक परिस्थितिको विश्लेषण र आगामी कार्ययोजना समेटिएको राजनीतिक प्रतिवेदन प्रस्तुत गरेका थिए । 

प्रतिवेदनमा नेपालले राजनीतिक परिस्थितिको बारेमा चर्चा गर्दै पार्टीले आगामी निर्वाचनमा राम्रो सफलता प्राप्त गर्ने विश्वास व्यक्त गरे । यस्तै उनले संसदले व्याख्यात्मक घोषणासहित एमसीसी सम्झौता अनुमोदन गर्दा पार्टीले राख्दै आएको अडान नै राष्ट्रिय अडानको रुपमा परिणत भएको उल्लेख गरे । ‘हाम्रो पार्टी न कसैसँग झुक्छ, न कुनै कुरामा बहकिन्छ, जहिले पनि देशको हितलाई केन्द्रबिन्दूमा राखेर काम गर्छ । एमसीसी सम्झौतालाई संसदबाट अनुमोदन गर्दा हामीले आफ्नो मान्यताबाट डगमगाएका छैनौं । बरु राष्ट्रिय तथा अन्तर्राष्ट्रिय परिस्थितिलाई मध्यनजर गर्दै सुझबुझपूर्ण निर्णय गरेका छौं’ नेपालको भनाइ थियो । 

आजको बैठकमा प्रस्तुत राजनीतिक प्रतिवेदनमाथि गम्भीर छलफल भएको सो पार्टीले जनाएको छ ।  छलफलमा पोलिटब्युरोका ३७ जना सदस्यहरुले आफ्ना धारणाहरू व्यक्त गरेको भुसालले जानकारी दिए । उनीहरुले राखेका विचार तथा सुझावहरूलाई समेटेर परिमार्जित प्रतिवेदन केन्द्रीय कमिटीमा प्रस्तुत गरिने जनाइएको छ ।  केन्द्रीय कमिटीको तेस्रो बैठक यही फागुन २५ र २६ गते कार्की बेङक्वेट बबरमहल, काठमाडौंमा बस्ने भुसालले जानकारी दिए ।