सङ्घीय संसद् सचिवालयले प्रधानन्यायाधीश चोलेन्द्रशमशेर जबराविरुद्धको महाभियोग प्रक्रिया अघि बढाउने तयारी थालेको छ ।

प्रतिनिधि सभा सचिवालयले आइतबारको बैठकमा महाभियोग प्रक्रिया अघि  बढाउने  गरी  सम्भावित  कार्यसूची  सार्वजनिक  गरेको छ ।

औपचारिक रूपमा कार्यसूची भने आइतबार बस्ने कार्यव्यवस्था  परामर्श  समितिले  टुङ्गो  लगाउने  छ  ।  

प्रतिनिधि सभाको गत आइतबारको बैठकले महाभियोग प्रक्रिया  अघि  बढाउन  सिफारिस  समिति  भने  गठन  गरेको थियो ।

प्रतिनिधि सभामा प्रस्तावको सूचना दर्ता भएको करिब एक महिनापछि संसद्मा पेस गर्ने तयारी गरिएको हो ।  फागुन  १  गते  प्रधानन्यायाधीश  जबराविरुद्ध  सत्ता  गठबन्धनका ९८ सांसदको हस्ताक्षरसहितको प्रस्तावको सूचना दर्ता भएको थियो ।

एक सातापछि प्रस्ताव अघि बढाउन  सकिने  भए  पनि  छलफलको  प्रक्रिया  अघि  बढाइएको छैन ।

अब  प्रस्तावक  सदस्यले  वक्तव्यसहित  प्रस्तावलाई  प्रतिनिधि  सभामा  पेस  गर्नेछन्  ।  प्रस्ताव  पेस  गरेपछि  सभामुखले  छलफलको  मिति  र  समय  तोक्न  सक्ने  व्यवस्था  नियमावलीमा  छ  ।

छलफलपछि  उक्त  प्रस्ताव  महाभियोग  सिफारिस  समितिमा  जानेछ  ।  महाभियोग  सिफारिस  समितिले  उक्त  प्रस्तावअनुसार  महाभियोगको  प्रक्रिया अघि बढ्न सक्ने वा नसक्नेबारे अनुसन्धान गरेर प्रतिवेदन दिनेछ । गोरखापत्र दैनिकमा खबर छ ।