काठमाडौँको बौद्धबाट रेडियोधर्मी पदार्थ 'युरेनियम’ जस्तो देखिने धातुसहित पक्राउ परेका आठ जना सामान्य तारेखमा छुटेका छन् ।

​ बरामद भएको युरेनियम परीक्षणमा पुष्टि नहुँदा  मुद्दा  अघि  बढ्ने  अवस्था  नभएपछि  उनीहरूलाई  सामान्य तारेखमा छाडिएको हो ।

जिल्ला  सरकारी  वकिलको  कार्यालय  काठमाडौँका  प्रमुख, सहन्यायाधिवक्ता  गङ्गाप्रसाद  पौडेलले  बरामद  भएको  धातु परीक्षण  गर्दा  युरेनियम  भएको  पुष्टि  नभएपछि  मुद्दा  अघि  बढ्ने अवस्था नभएको बताए ।

गत फागुन ३ गते काठमाडौँको बौद्धस्थित  हायात  रिजेन्सी  होटलको  कार  पार्किङ  गर्ने  स्थानमा पार्किङ गरिराखेको बा ५ च ८२०९ नम्बरको कारभित्रबाट दुई किलो आठ सय ग्राम तौल भएको युरेनियम जस्तो पदार्थ बरामद गरेको  थियो ।  

नेपाल  विज्ञान  तथा  प्रविधि  प्रज्ञा  प्रतिष्ठान  (नास्ट) तथा खानी विभागमा बरामद   पदार्थको परीक्षण गरिएको थियो । दुवै  ठाउँबाट  परीक्षणको  नतिजा  नकारात्मक    आएको  पौडेलले जानकारी दिए ।

महानगरीय प्रहरी परिसर काठमाडौँले प्रवक्ता, प्रहरी उपरीक्षक दिनेशराज मैनालीले बरामद धातु युरेनियम पुष्टि हुन नसकेपछि पक्राउ परेका सबैजनालाई सामान्य तारेकमा रिहा गरिएको बताए  । गोरखापत्र दैनिकमा खबर छ ।