१७ असार २०८३, बुधबार
सरुवा भएको दुई महिनासम्म पनि अटेर गर्दै सशस्त्र प्रहरी बलका प्रहरी उपरीक्षक (एसपी) अहिलेसम्म पनि कमाण्ड सम्हाल्न गएका छैनन् ।
नम्बर ९ पशुपतिनाथ बाहिनी बलम्बुमा कार्यरत समिककुमार महर्जन अहिलेसम्म पनि रमाना लिएर कार्यस्थल नगएका हुन् ।
माघ २५ गते सरुवा भएका उनी नगएपछि सशस्त्र प्रहरी बलले कामु सशस्त्र एसएसपी प्रविण कँडेलको अध्यक्षतामा छानबिन समिति गठन गरेको थियो ।
तर, उक्त समितिले पनि उनकै पक्षमा प्रतिवेदन तयार गरेपछि सशस्त्र प्रहरीमा चेनअफ कमाण्डको धज्जी उठाएको चर्चा हुँदै आएको एक अधिकृतले लोकान्तरलाई बताए ।
समितिले घरायसी कारण र परीक्षा नजिकिएको भन्दै सरुवा भएको ठाउँमा नगएको प्रतिवेदन बुझाएको ती अधिकृतले बताए ।
प्रतिवेदनमा कुन परीक्षा कहिले हुने ? भन्ने जस्ता कुराहरू प्रतिवेदनमा नखुलाइएपछि सशस्त्र प्रहरीमा विभिन्न किसिमका आशंका उब्जिएको सशस्त्र अधिकारीहरू बताउँछन् ।
लोकान्तरले ‘सरुवा भएको एक महिनासम्म पनि कार्यस्थल पुगेनन् सशस्त्र एसपी महर्जन’ शीर्षकको समाचार प्रकाशन गरेपछि सशस्त्र प्रहरीले छानबिन समिति गठन गरेको थियो ।
