०२ साउन २०८३, शनिबार
नेकपा (माओवादी केन्द्र) कर्णाली प्रदेश सभा दलका प्रमुख सचेतक ठम्मर विष्टलाई निलम्बन गरिएको छ ।
प्रदेश सभा सदस्य पदबाट राजीनामा बुझाएपछि प्रदेश सभा दलका नेता तथा पूर्वमुख्यमन्त्री महेन्द्रबहादुर शाहीको अध्यक्षतामा फागुन ३ गते बसेको बैठकले उनलाई राजीनामा फिर्ता लिएर नियमित कार्यमा क्रियाशील हुन निर्देशन गरेको थियो ।
निरन्तर पार्टीको विधानविपरीत अभिव्यक्ति दिनुका साथै निर्देशनको अवज्ञा गरेको भन्दै दलका नेता शाहीले आइतवार एक प्रेस वक्तव्य जारी गरी प्रमुख सचेतक विष्टलाई पार्टीको सदस्यबाट निलम्बन गरिएको जानकारी दिएका हुन् ।
इमेलबाट प्रमुख सचेतक विष्टले फागुन २७ गते प्रदेश सभा सदस्यबाट राजीनामा दिएका थिए ।
नेपालको संविधानको धारा, १८० (क) बमोजिम प्रदेश सभा सभामुखसमक्ष राजीनामा दिएका उनले चैत ४ गते सदस्य पद छाडेको सनाखत गरेपछि सभामुख राजबहादुर शाहीले उनको राजीनामा स्वीकृत गरेका थिए । विष्टको राजीनामा स्वीकृत र माओवादी केन्द्रको निलम्बनको सूचनासँगै उक्त पद रिक्त भएको प्रदेश सभा सचिवालयले जनाएको छ ।
विष्ट एमाले प्रवेश गर्ने तयारीमा छन् ।
