१९ असार २०८३, शुक्रबार
नेकपा एमालेले प्रतिनिधि सभामा जारी अवरोध हटाउनका लागि पार्टीले कारबाही गरेका माधव नेपालसहित १४ सांसदमाथि कारबाही या सभामुख अग्नि सापकोटाको राजीनामा शर्त रहेको बताएको छ ।
सदनको प्रतिपक्षी मात्र नभई मुलुककै ठूलो दलले अगाडि सारेको लोकतन्त्रसँग जोडिएको प्रश्नमा गम्भीर ढंगले छलफल नगरिएको एमालेको आरोप छ ।
बुधवार शुरू एमाले केन्द्रीय कमिटी बैठकमा पेश गरेको राजनीतिक प्रतिवेदनमा अध्यक्ष केपी ओलीले सदन सञ्चालनका लागि सभामुख र गठबन्धनको भूमिका निष्पक्ष नभएको आरोप लगाएका हुन् । ओलीले संसदलाई बेकम्मा सावित गर्ने दूराशय देखिएको समेत टिप्पणी गरेका छन् ।
‘हाम्रो पार्टी स्पष्ट छ– प्रतिनिधि सभा पुनःस्थापना गर्ने २०७८ असार २८ गतेको परामादेशप्रति गम्भीर असहमतिका बाबजुद हामी सदनलाई नियमित सञ्चालन र प्रभावकारी बनाउन चाहन्छौं । र, त्यसैगरी प्रस्तुत पनि भइरहेका थियौं । तर त्यसका लागि या त १४ जना सांसदहरूको कारबाहीको सूचना सभामुखले टाँस गर्नुपर्छ या निजले पदबाट राजीनामा दिनुपर्छ,’ ओलीले पेश गरेको राजनीतिक प्रतिवेदनमा उल्लेख छ ।
भदौ २३ गतेदेखि एमालेले लगातार प्रतिनिधि सभामा वेल घेराउ गर्दै आएको छ । फागुन ३० गतेदेखि सरकारले संसदको अधिवेशन नै अन्त्य गरेको छ ।
