तरलता अभाव कम गर्न विदेशबाट पैसा आउने व्यवस्थामा सहजीकरण गर्न नेपाल बैंकर्स संघले माग गरेको छ । 

आइतवार संसदको अर्थ समितिमा बोल्दै बैंकर्स संघका उपाध्यक्ष सुनिल केसीले नेपालभित्र पैसा भित्रने अवसर नभएकोले यसलाई सहजीकरण गर्नुपर्ने बताएका हुन् । 

उनले नेपालमा विदेशबाट पैसा ल्याउँदा त्यसलाई फिर्ता गर्दा हेजिङको व्यवस्था नभएको बताए । डलरको भाउ बढिरहेकोले घाटा कम गर्ने गरी हेजिङ फण्ड बनाएर विदेशबाट पैसा ल्याउँदा सहजै तिर्ने व्यवस्था हुनुपर्ने उनको भनाइ छ । 

नेपालका बैंकको पुँजी कमी भइसकेकोले अब कसरी बढाउने भन्नेतर्फ सोच्नुपर्ने पनि उनले बताए । 'नेपालमा अहिलेसम्म १२/१३ वटा बैंकले मात्रै थप कर्जा दिन सक्ने अवस्थामा छ,' उनले भने । 

समितिमा मेगा बैंककी सीईओ अनुपमा खुन्जेली पनि बैंकमा लगानीयोग्य रकम कम हुँदै गएको बताएकी छन् । उनले अहिले बैंक चरम संकटमा पुगेको बताइन् । 

उनका अनुसार बैंकहरूले अहिले दैनिक २०० अर्बको अस्थायी तरलता सुविधा (एसएलएफ) लिएर चलाउनु परिरहेको छ ।