२२ जेठ २०८३, शुक्रबार
नेपाली कांग्रेसका संस्थापक स्व. बीपी कोइरालाको भारतस्थित पटनामा रहेको सालिकको स्थायित्व र संरक्षणका लागि तत्काल पहल गर्न बिहारका विधानसभा सदस्य प्रा.डा. वीरेन्द्रनारायण यादवले माग गरेका छन् ।
उनले बिहार राज्य सरकारसमक्ष संरक्षणको लिखित माग गरेका हुन् ।
बीपीको सालिक संरक्षण संवद्र्धनका लागि बीपी संग्रहालय सुन्दरीजलका अध्यक्ष परशुराम पोखरेलको प्रतिनिधि मण्डलले पटक–पटक ध्यानाकर्षण गराएपछि विधानसभा सदस्य यादवले सरकारसँग लिखित धारणा माग गरेका हुन् ।
यसअघि पोखरेल नेतृत्वको टोलीले गत फागुन दोस्रो साता गरेको पटना भ्रमणका क्रममा भारतीय नेताहरूलाई यस विषयमा ध्यानाकर्षण गराएको थियो ।
बीपी कोइराला भारतको स्वतन्त्रताका लागि बेलायती शासन विरुद्धको भारत छोडो आन्दोलनमा सहभागी भएका थिए । स्वतन्त्रतापछि भारतका प्रथम राष्ट्रपति बनेका डा. राजेन्द्रप्रसादसँग बीपी कोइराला भारतको स्वतन्त्रता आन्दोलनमा हजारीबाग जेलमा बसेका थिए । उक्त कुरालाई यादवले स्मरण गराएका छन् ।
हजारीबाग जेलमा मात्रै बीपी ३ वर्ष ६ महिना बसेका थिए । पटक–पटक गरेर झण्डै ४ वर्ष बीपी भारतको जेलमा बसेका जानकारी संग्रहालयका अध्यक्ष पोखरेलले दिए । बीपी १५ वर्षकै उमेरमा भारतीय स्वतन्त्रता आन्दोलनमा सहभागी भएका थिए ।
भारत स्वतन्त्र हुने भएपछि बीपीलगायत भारतीय नेताहरूलाई अंग्रेज सरकारले रिहा गरेको थियो ।
भारतको लोकतान्त्रिक आन्दोलनमा पुर्याएको योगदानको कदर गर्दै सन् १९९४ मा बिहारको राजधानी पटनामा बीपीको सालिक बनाइएको थियो । बीपी धर्मपत्नी सुशीला कोइरालाको उपस्थितिमा बिहारका तत्कालीन मुख्यमन्त्री लालुप्रसाद यादवले सालिकको अनावरण गरेका थिए । पटनाको गोलघरस्थित पार्कमा रहेको बीपीको सालिक संरक्षण हुन नसकेको भन्दै संग्रहालयले त्यसको प्रबन्ध मिलाउन पहल गर्दै आएको थियो । संग्रहालयका अध्यक्ष पोखरेलले विधान सभाका सदस्यले बीपीको सालिक संरक्षणका लागि लिखित रूपमा नै माग गरेपछि त्यसको संरक्षण संवद्र्धन हुने आशा पलाएको बताए ।
छिमेकी देशको लोकतन्त्रवादी नेतालाई यसरी स्थान दिइनु सुखद् पक्ष भएको उनको भनाइ छ ।
विधानसभा सदस्य यादवले भारतको स्वतन्त्रतासम्बन्धी आन्दोलनमा महत्त्वपूर्ण भूमिका निर्वाह गरेका बीपीको सालिक संरक्षण गर्नुपर्ने आवश्यकता औंल्याएका हुन् । लोकतन्त्रमा बीपीको नाम विश्वभर नै लिइने र भारतमा समेत विशेष योगदान रहेकाले सालिकको संरक्षण गर्नु बिहार सरकारको समेत विशेष दायित्व हुने उनले आफ्नो मागपत्रमा उल्लेख गरेका छन् ।
नेपालको लोकतन्त्र र बीपी कोइरालाको योगदानबारे पटक–पटक आवाज उठाउँदै आएका विधान सभाका सदस्य यादवलाई संग्रहालय भ्रमणको निम्तो समेत दिइएको जानकारी पोखरेलले दिए । गोरखापत्रमा खबर छ ।
