१३ असार २०८३, शनिबार
विराटनगर । भारत तस्करी हुन लागेको ठूलो परिमाणमा लागूऔषध गाँजा प्रहरीले नियन्त्रणमा लिएको छ ।
नेपाल–भारत सीमा क्षेत्रअन्तर्गत विराटनगर महानगरपालिका–१८ मा एउटा पिकअप भ्यानभित्र तस्करी हुन लागेको ठूलो परिणाममा लागुऔषध गाँजा प्रहरीले नियन्त्रणमा लिएको हो ।
इलाका प्रहरी कार्यालय बुधनगरको टोलीले चेकजाँचका क्रममा को१च ५३१८ नम्बरको पिकअपबाट एक सय २० किलो गाँजा र पाँच सय ५४ किलो अदुवा फेला पारेको मोरङ प्रहरीका प्रवक्ता डिएसपी दीपक श्रेष्ठले जानकारी दिए ।
प्रहरीका अनुसार निलो त्रिपालले छोपेको पिकअपभित्र गाँजा र अदुवा फेला परेको हो ।
गाडी भित्र तीन वटा सेतो बोरामा प्याकिङ गरिएको अवस्थामा गाँजा, अदुवा र ६ पोका ४५ केजी धानको भुस समेत बरामद गरिएको डिएसपी श्रेष्ठले जानकारी दिए ।
बोराभित्र हालेर सबैभन्दा तल गाँजा र अदुवा राख्दै माथिबाट धानको भुसले छोपेको अवस्थामा पिकअपलाई प्रहरीले नियन्त्रणमा लिइएको थियो । तस्करी गरेर गाँजा र अदुवा भारततिर लैजान खोजिएको हुनसक्ने प्रहरीको अनुमान रहेको छ ।
नेपालबाट भारततिर जाँदै गरेको पिकअपलाई प्रहरीले राति १० बजे चेकजाँच गर्न खोज्दा चालक भने गाडी छाडेर फरार भएका छन् ।
फरार चालकको खोजी तीव्र बनाइएको प्रहरीले जनाएको छ ।
नेपालबाट लागुऔषध गाँजा लुकाईछिपाई भारततिर तस्करी हुने गरेको छ ।
नेपालमा भन्दा महँगो मूल्य पर्ने भएपछि गाँजा भारततिर तस्करी हुने गरेको प्रहरीको भनाइ छ ।
