०६ असार २०८३, शनिबार
स्थानीय तह निर्वाचन, २०७९ मा मनोनयन दर्ताको पहिलो दिन देशभरि दस हजार ५३३ जनाले मनोनयन दर्ता गराएका छन् ।
निर्वाचन आयोगले पहिलो दिन दर्ता भएको सङ्ख्या 'साङ्केतिक’ मात्रै भएको टिप्पणी गरेको छ ।
निर्वाचन आयोगका प्रवक्ता शालिग्राम शर्मा पौडेलले ७५३ स्थानीय तहमा नै निर्वाचन अधिकृतको कार्यालयमार्फत मनोनयन दर्ता सुरु भएको बताए ।
उम्मेदवारी दर्ता भएकामा ठूलो सङ्ख्यामा स्वतन्त्र उम्मेदवार छन् । आइतबार अबेरसम्म सत्तारूढ गठबन्धन र अन्य दलले उम्मेदवारको टुङ्गो लगाउन बाँकी रहँदा मनोनयन दर्ता गराउनेमा बढी स्वतन्त्र उम्मेदवार छन् ।
एकै दिन मनोनयन दर्ता राख्दा निर्वाचन तालिका प्रभावित हुने हुनाले दलहरूकै सुझावमा आयोगले वैशाख ११ र १२ गते गरी दुई दिन मनोनयन दर्ता गर्न लागेको हो तर आयोगको अपेक्षाविपरीत दर्ताको अन्तिम दिन सोमबार उम्मेदवारको चाप बढ्ने देखिएको छ ।
आयोगका सहायक प्रवक्ता सूर्यप्रसाद अर्यालका अनुसार उम्मेदवारी दर्ता गराएकोमा सात हजार २७ पुरुष र तीन हजार ५०६ जना महिला छन् । आयोगले अध्यक्ष/प्रमुख पदका लागि मनोनयन दर्ताको पहिलो दिन ९८७ जनाको उम्मेदवारी परेको जनाएको छ । जसमध्ये ९१० पुरुष र ७७ जना महिला तथा अन्य समूहबाट उम्मेदवारी परेको छ । उपप्रमुख पदका लागि ५०८ जनाको उम्मेदवारी परेको छ ।
उपप्रमुखमा अधिकांश महिला छन् । उपप्रमुख पदमा ११३ पुरुष र ३९५ जना महिलाले उम्मेदवारी दर्ता गराएका छन् । वडाध्यक्ष पदका लागि तीन हजार १९० जनाको उम्मेदवारी परेको छ । जसमध्ये दुई हजार ८१४ पुरुष र १०७ जना महिला छन् । वडासदस्यका लागि उम्मेदवारी दर्ताको पहिलो दिन छ हजार ११७ जनाले मनोनयन दर्ता गराएको निर्वाचन आयोगले जनाएको छ ।
खुला सदस्यमा तीन हजार १९० पुरुष र १४८ महिला गरी तीन हजार ३३८ जनाले उम्मेदवारी दर्ता गराएका छन् । महिला वडासदस्यमा एक हजार ५७६ र दलित महिला सदस्यमा एक हजार २०३ जनाले उम्मेदवारी दर्ता गराएका छन् । गोरखापत्र दैनिकमा इश्वरचन्द्र झाले खबर लेखेका छन् ।
