लागूऔषध  ओसारपसार  तथा  कारोबारमा  संलग्न  अन्तर्राष्ट्रिय  आपराधिक  समूहका  लागि  नेपाल 'ट्रान्जिट हब’ बन्ने गरेको पाइएको छ ।

दक्षिण अफ्रिकाबाट हवाई मार्ग हुँदै काठमाडौँ भित्रिएको सात किलो सेतो हेरोइन भारत पठाउने तयारी गरिहेको अवस्थामा लाजिम्पाटबाट बरामद भएपछि सो रहस्य खुलेको हो ।

प्रहरीको लागूऔषध नियन्त्रण ब्युरोले दक्षिण अफ्रिकाको जोहानसबर्ग, कतारको दोहा हुँदै त्रिभुवन  अन्तर्राष्ट्रिय  विमानस्थलबाट  काठमाडौँ  भित्रिएको उक्त लागू औषध लाजिम्पाटस्थित विदेशी महिलाको साथबाट बरामद गरेको हो ।

लागूऔषध बोेकेर नेपाल आएकी जाम्बियाकी नागरिक  ३५  वर्षीया  कोपुतुला  अविसार्ग  र  लागूऔषध  बुझ्न  आएकी  भारतीय  नागरिक  ३५  वर्षीया लाल नुनपुई पक्राउ परेका हुन् ।

भिजिट भिसामा काठमाडौँ  प्रवेश  पाएकी  अविसार्गले  सुटकेसभित्र  फल्स बटम बनाई लुकाइछिपाई ल्याएको प्रहरीले जनाएको छ ।

पक्राउ परेका अभियुक्तमा अविसार्ग विद्यार्थी र नुनपुईले रेस्टुरेन्टमा काम गर्ने वेटर भएको हुलिया खुलाएका छन् ।

ब्युरो प्रहरी प्रवक्ता जीवनकुमार श्रेष्ठ  दुवैजना  लागूऔषध  ओसारपसारमा  संलग्न  अन्तर्राष्ट्रिय  गिरोहको  सदस्य  भएको  हुनसक्ने  बताउँछन् ।  

प्रहरीलाई  प्राप्त  विशेष  सूचनाका  आधारमा ब्युरो प्रहरीले अन्तर्राष्ट्रिय विमानस्थलबाट नै पिछा गरेको थियो । ब्युरो प्रवक्ता श्रेष्ठका अनुसार यतिको हेरोइन बरामद भएको यो घटना पहिलो हो । यसअघि कोकिन र अफिम पनि ठूलो परिमाणमा बरामद हुने गरेको थियो । गोरखापत्र दैनिकमा खबर छ ।