सर्वोच्च अदालतमा आर्थिक वर्ष २०८२/८३ मा मुद्दा तथा निवेदन फर्छ्यौट गर्नेमध्ये न्यायाधीश टेकप्रसाद ढुंगाना पहिलो स्थानमा रहेका छन् । प्रधानन्यायाधीश डा. मनोजकुमार शर्मा भने मुद्दा फर्छ्यौटका आधारमा १५ औं स्थानमा परेका छन् ।

त्यसैगरी, निवर्तमान प्रधानन्यायाधीश प्रकाशमान सिंह राउत सूचीको सबैभन्दा अन्तिम अर्थात् बीसौँ स्थानमा रहेका छन् ।

मुद्दा तथा निवेदन फर्छ्यौटमा पहिलो स्थानमा रहेका न्यायाधीश टेकप्रसाद ढुंगानाले २०५ कार्य दिनमा ९.४४ को दैनिक औसतले कुल १ हजार ९ सय ३६ थान मुद्दा फर्छ्यौट गरेका छन् ।

यसैगरी, दोस्रो स्थान हासिल गरेका न्यायाधीश श्रीकान्त पौडेलले २०२ कार्य दिनमा ८.४५ को औसतले कुल १ हजार ७ सय ७ थान मुद्दा किनारा लगाएका छन् ।

तेस्रो स्थानमा रहेका न्यायाधीश हरिप्रसाद फुयालले १९२ कार्य दिनमा ८.०६ को औसतले कुल १ हजार ५ सय ४८ थान मुद्दा फर्छ्यौट गरेका छन् ।

चौथो स्थानमा रहेका न्यायाधीश सुनिलकुमार पोखरेलले २०२ कार्य दिनमा ७.६४ को औसतले कुल १ हजार ५ सय ४४ थान र पाँचौं स्थानमा रहेका न्यायाधीश महेश शर्मा पौडेलले २०१ कार्य दिनमा ७.६२ को औसतले कुल १ हजार ५ सय ३२ थान मुद्दा फर्छ्यौट गरेका छन् ।

सूचीको छैटौं स्थानमा रहेका न्यायाधीश अब्दुल अजीज मुसलमानले १९३ कार्य दिनमा ७.३६ को औसतले कुल १ हजार ४ सय २० थान मुद्दा फर्छ्यौट गरेका छन् ।

सातौं स्थान प्राप्त गरेका न्यायाधीश मेघराज पोखरेलले १९५ कार्य दिनमा ७.२७ को औसतले कुल १ हजार ४ सय १७ थान मुद्दा फर्छ्यौट गर्दा आठौं  स्थानमा रहेकी न्यायाधीश शान्तिसिंह थापाले १७९ कार्य दिनमा ७.६१ को औसतले कुल १ हजार ३ सय ६२ थान मुद्दा फर्छ्यौट गरेकी छन् ।

नवौं स्थानमा रहेका न्यायाधीश कुमार रेग्मीले १७७ कार्य दिनमा ७.५८ को औसतले कुल १ हजार ३ सय ४२ थान र दशौं स्थानका न्यायाधीश नित्यानन्द पाण्डेयले २०१ कार्य दिनमा ६.५८ को औसतले कुल १ हजार ३ सय २२ थान मुद्दा फर्छ्यौट गरेका छन् ।

एघारौं स्थानमा रहेका न्यायाधीश बालकृष्ण ढकालले १८६ कार्य दिनमा ६.९९ को औसतले कुल १ हजार ३ सय थान मुद्दा फर्छ्यौट गरेका छन् ।

बाह्रौँ स्थानमा रहेका न्यायाधीश नृपध्वज निरौलाले १७१ कार्य दिनमा ७.२६ को औसतले कुल १ हजार २ सय ४१ थान मुद्दा फर्छ्यौट गर्दा तेह्रौँ स्थानमा रहेका न्यायाधीश डा. नहकुल सुवेदीले १७० कार्य दिनमा ६.७४ को औसतले कुल १ हजार १ सय ४६ थान मुद्दा फर्छ्यौट गरेका छन् ।

चौधौँ स्थानमा रहेकी न्यायाधीश शारङ्गा सुवेदीले १७० कार्य दिनमा ६.६२ को औसतले कुल १ हजार १ सय २५ थान मुद्दा फर्छ्यौट गरेकी छन् ।

यसैगरी, १५ औँ स्थानमा रहेका प्रधानन्यायाधीश डा. मनोजकुमार शर्माले १८९ कार्य दिनमा ५.७९ को औसतले कुल १ हजार ९४ थान मुद्दा  फर्छ्यौट गरेका छन् ।

सोह्रौँ स्थानमा रहेका न्यायाधीश विनोद शर्माले १५९ कार्य दिनमा ६.६० को औसतले कुल १ हजार ४९ थान फर्छ्यौट गर्दा सत्रौँ स्थानका न्यायाधीश तिलप्रसाद श्रेष्ठले १३० कार्य दिनमा ८.०४ को औसतले कुल १ हजार ४५ थान मुद्दा फर्छ्यौट गरेका छन् ।  न्यायाधीश श्रेष्ठ पछिल्लो समय बिरामी भएका कारण स्वास्थ्य उपचारका क्रममा छन् ।

अठारौँ स्थानमा रहेकी न्यायाधीश सपना प्रधान मल्लले १२२ कार्य दिनमा ७.६६ को औसतले कुल ९ सय ३४ थान मुद्दा फर्छ्यौट गरेकी छन् ।  उनले केही महिना कायम मुकायम प्रधानन्यायाधीशको रूपमा पनि काम गरेकी थिइन् । प्रधानन्यायाधीशमा डा. मनोज कुमार शर्माले पदभार ग्रहण गर्दा केही साता उनी बिदामा बसेकी थिइन् ।

उन्नाइसौँ स्थानमा रहेका न्यायाधीश डा. कुमार चुडालले ३४ कार्य दिनमा ९.५० को औसतले कुल ३ सय २३ थान मुद्दा फर्छ्यौट गर्दा बीसौँ स्थानमा रहेका निवर्तमान प्रधानन्यायाधीश प्रकाशमान सिंह राउतले ५८ कार्य दिनमा ३.५३ को औसतले कुल २ सय ५ थान फर्छ्यौट गरेका छन् ।

सर्वोच्च अदालतका २० जना न्यायाधीशहरूले कुल ३ हजार ३ सय ३६ कार्य दिनमा २४ हजार ४ सय ९२ थान मुद्दा, रिट र निवेदनहरू फर्छ्यौट गरेका छन् ।

न्यायपालिकाको समग्र प्रगति: ७० प्रतिशतभन्दा बढी फर्छ्यौटसहित उच्च अदालत अग्रस्थानमा

न्यायपालिकाको २०८३ असार मसान्तसम्मको समग्र प्रगति विवरण अनुसार देशभरका सबै तहका अदालत र न्यायाधीकरणहरूमा कुल ३ लाख ५७ हजार २३ थान मुद्दाको लगत कायम रहेकोमा १ लाख ९५ हजार ४ सय ७४ थान मुद्दा फर्छ्यौट भएका छन् । यो कुल लगतको ५४.७५ प्रतिशत फर्छ्यौट प्रगति हो ।

त्यसमध्ये  सर्वोच्च अदालतमा कुल ३८ हजार ९ सय ३६ थान मुद्दाको लगत रहेकोमा ११ हजार ४ सय ६९ थान (२९.४६ प्रतिशत) फर्छ्यौट भई २७ हजार ४ सय ६७ थान मुद्दा बाँकी रहेका छन्, जसमा ५ वर्ष नाघेका मुद्दा मात्रै १ हजार २ सय ७६ थान रहेका छन् ।

उच्च अदालतहरूमा ६० हजार ५ सय ६४ थान लगत रहेकोमा ४२ हजार ६ सय १४ थान (७०.३६ प्रतिशत) फर्छ्यौट भई १७ हजार ९ सय ५० थान मुद्दा बाँकी छन्, जहाँ २ वर्ष नाघेका कुनै पनि मुद्दा बाँकी नरहेको प्रगति विवरणमा उल्लेख छ ।

यसैगरी, जिल्ला अदालतहरूमा कुल २ लाख ५१ हजार ७ सय ३४ थान लगतमध्ये १ लाख ३९ हजार १ सय ७९ थान (५५.६१ प्रतिशत) फर्छ्यौट भई १ लाख ११ हजार ७ सय ५५ थान बाँकी रहेका छन्, जसमा ७ हजार ६ सय ९१ थान मुद्दा २ वर्ष नाघेका छन् ।

न्यायाधीकरणहरूमा ५ हजार ७ सय ८९ थान लगत रहेकोमा २ हजार ४ सय १२ थान (४१.६७ प्रतिशत) फर्छ्यौट भई ३ हजार ३ सय ३७ थान मुद्दा फर्छ्यौट हुन बाँकी रहेका छन् ।

समग्र न्यायपालिकाको वार्षिक लक्ष्य २ लाख ४३ हजार ३ सय ५६ थान मुद्दा फर्छ्यौट गर्ने रहेकोमा जेठ/असारसम्मको प्रगति १ लाख ९६ हजार ३ सय ९० थान रहेको छ, जुन वार्षिक लक्ष्यको तुलनामा ८०.७० प्रतिशत प्रगति दर हो ।