२९ जेठ २०८३, शुक्रबार
नेकपा माओवादी केन्द्रले नेपालगञ्ज उपमहानगरपालिकामा अन्यायपूर्ण तरिकाले गठबन्धन गरिएको जनाउँदै गठबन्धनमा नबस्ने निर्णयसहित एक्लै निर्वाचनमा जाने घोषणा गरेपछि अन्योल उत्पन्न भएको छ ।
सत्ता गठबन्धनबाट माओवादी केन्द्रले नेपालगञ्जमा प्रमुख र उपप्रमुख दुवै नपाएपछि धेरै वडा पाउने अडान राखेकोमा नेपाली काँग्रेस र जनता समाजवादी पार्टीले धेरै वडा पनि छोड्न नमानेपछि माओवादीले गठबन्धनबाट बाहिरिने निर्णय गरेको दलका नेपालगञ्ज अध्यक्ष रतन शाहीले बताए ।
सोही कारणले माओवादी केन्द्र नेपालगञ्जले प्रमुख र उपप्रमुखलगायत सबै वडाध्यक्षमा उम्मेदवारी दिएर एक्लै निर्वाचन लड्ने निर्णय गरेको अध्यक्ष शाहीले बताए ।
सत्ता गठबन्धनको केन्द्रीय निर्णयअनुसार नेपालगञ्जमा नेपाली काँग्रेसलाई प्रमुख र जनता समाजवादी पार्टीलाई उपप्रमुख दिने सहमति भएको थियो ।
सो सहमति भएलगत्तै प्रमुख मागिरहेको जसपाले पनि कडा विरोध जनाएको थियो भने माओवादी केन्द्रले पनि अन्याय गरिएको प्रतिक्रिया दिँदै चर्को विरोध गरेको थियो । तर, पछि केन्द्रीय नेता र स्थानीय कार्यकर्ताको दबाबले गर्दा जसपाले उपप्रमुखमै चित्त बुझाएको थियो ।
नेपालगञ्जका २३ वटा वडामा भागबन्डा गर्न माओवादीले छलफल गर्दा काँग्रेस र जसपाले अधिकांश वडा छोड्न नमानेपछि गठबन्धनमा बस्नुको औचित्य नरहेको जनाउँदै गठबन्धनबाट बाहिरिएर एक्लै निर्वाचनमा जाने घोषणा गरेको माओवादी केन्द्र नेपालगञ्जले जनाएको छ ।
जसपा र नेपाली काँग्रेसले पनि सबै वडामा उम्मेदवारी दिने निर्णय गरेको छ । माओवादी केन्द्रले गठबन्धनबाट बाहिरिने निर्णय गरेपछि गठबन्धनको अवस्था के रहने हो भन्ने बारेमा अन्योल उत्पन्न भएको छ । बाँके काँग्रेस र जसपाले आ–आफ्नो केन्द्रमार्फत माओवादीलाई गठबन्धन नछोड्न दबाब सिर्जना गराउने प्रयास गरिरहेको बुझिएको छ । गोरखापत्र दैनिकमा खबर छ ।
