रौतहटको चन्द्रपुर नगरपालिकामा एक कार्यकाल नेपाली कांग्रेसले नेतृत्व गरिसकेको छ । अहिले कांग्रेस त्यही विरासत जोगाउने प्रयासमा छ तर यसअघिका मेयर रामचन्द्र चौधरीले टिकट नपाएपछि बागी उम्मेदवारी दर्ता गरेका छन् ।

बागी उम्मेदवारको चुनौतीबीच यसअघि वडाध्यक्ष जितेका सञ्जयकुमार काफ्ले मेयरको उम्मेदवार बनेका छन् ।

उनै काफ्लेसँग चुनावी एजेण्डा, पार्टी भित्रको राजनीतिक समीकरण र चुनावी प्रतिस्पर्धाका सम्बन्धमा लोकान्तरकर्मी विन्देश दहाल र उद्धव थापाले गरेको कुराकानीको सम्पादित अंश ः

तपाईं चन्द्रपुर नगरपालिकाको एउटा वडाको अध्यक्ष भइसकेको मान्छे अहिले मेयरमा लड्दै हुनुहुन्छ । जनताले तपाईंलाई किन मेयर बनाउने ?

– अघिल्लो चुनावमा म वडा नम्बर ५ को अध्यक्ष निर्वाचित भएको थिएँ । यस ५ वर्षको अवधिमा म आफ्नो वडालाई पूरै नगरपालिका भित्रकै सबभन्दा अब्बल वडा बनाउन सफल भएँ । अन्य वडामा भन्दा पनि मेरो वडामा विकासका गतिविधिहरू देखिए ।

वडामा मैले गरेको काम देखेर जनताले मलाई वडाको मात्र नभई नगरकै नेतृत्व गर्न प्रेरित गर्नुभयो । उहाँहरूकै सुझावका आधारमा मैले यसपालि नगरपालिकाको मेयर पदमा दाबी पेश गरेको हुँ ।

तपाईं मेयर निर्वाचित भइसकेपछि अर्को ५ वर्षमा चन्द्रपुर नगरपालिका कस्तो भएको पाइनेछ ?

– ५ वर्षमा तपाईं धेरै कुरा फरक भइसकेको देख्नुहुनेछ । यहाँ पर्यटकीय महत्त्व बोकेका धेरै ठाउँहरू छन् । नूनथर, जीपी उद्यान, निजानन्दधाम, मद्दर सिमसार यी पर्यटकीय स्थलहरूलाई आकर्षणको केन्द्र बनाउनका लागि राज्य र नगरको लगानी लगाउने हाम्रो योजना छ । 

शिक्षा स्वास्थ्य लगायतका आधारभूत क्षेत्रमा के–के गर्नुहुनेछ ?

– यी महत्त्वपूर्ण कुरा हुन् । यसमा हामीले जनतालाई साथमा लिएर काम गर्नेछौं । कुनै पनि नगरपालिकाको विकासमा त्यस क्षेत्रका मतदाताको सचेतता अत्यन्त आवश्यक हुने रहेछ । त्यो सचेतता बढाउने शिक्षाले नै हो । त्यसमा हाम्रो जोड रहनेछ ।

देशभर गठबन्धन भएको छ तर यहाँ तपाईंहरू एक्लाएक्लै लडिरहनुभएको छ । तपाईंहरूको जित्ने माहोल छ त ?

– गठबन्धनको सम्भावना यहाँ न्यून छ । गठबन्धनका पक्षधरहरू पनि प्रतिस्पर्धामा उत्रिनुभएको छ । उहाँहरूसँग हाम्रो मित्रवत व्यवहार छ । नगरको विकास, समृद्धि, शिक्षाको सुदृढीकरण, सरकारी अस्पताललाई ट्रमा सेन्टरको रूपमा विकास गर्ने काम लगायतका कामहरू सबै पार्टीले गर्न खोजेका छन् । त्यसमा हामी सबैको सहकार्य रहनेछ ।

तपाईंको पार्टीबाट बागी उम्मेदवार उठ्नुभएको रहेछ । उहाँले तपाईंलाई कत्तिको अप्ठ्यारो पार्नुहुनेछ ?

– एउटा व्यक्ति आफैंमा केही हुँदैन । म पनि पार्टीको लोगो बोकेकोले नै यहाँसम्म आइपुगेको हुँ । पार्टी संगठनमा रहेर अघि नबढेमा व्यक्तिको प्रभाव रहँदैन । निवर्तमान मेयर रामचन्द्र चौधरीले पार्टीको नाम र इज्जत राख्नुहुन्छ भन्ने हाम्रो अपेक्षा थियो । मेयर छँदा उहाँले धेरै काम गर्नुभएको हो तर पार्टीमा संगठनमा छँदा उहाँले पार्टीका साथीहरूलाई सँगै लिएर हिँड्नुपर्थ्यो । युवालाई पनि नेतृत्वमा ल्याउनुपर्छ भनी पार्टीले निर्णय गरेको हुँदा उहाँ अलि ओझेलमा पर्नुभएको हो । उहाँ स्वतन्त्र उम्मेदवारका रूपमा उठ्दा पार्टीलाई केही असर त पर्छ । उहाँ आफ्नो उम्मेदवारी फिर्ता गरेर पार्टीलाई सहयोग गर्न आउनुहुन्छ भन्ने मेरो अपेक्षा छ ।

यस चुनावमा तपाईंको सबभन्दा बलियो प्रतिस्पर्धी को हो ?

– यस क्षेत्रमा कांग्रेस एकढिक्का छ । देवप्रसाद तिमल्सेना यहाँबाट सांसद हुनुहुन्छ । उहाँ अत्यन्तै लोकप्रिय व्यक्ति हो । उहाँको साथ सहयोग मैले पाइरहेको छु । त्यसैले नेपाली कांग्रेसले यस नगरपालिकाको दशैं वडामा अनि मेयर उपमेयर जित्छ भन्ने कुरामा म विश्वस्त छु । 

तपाईंहरू पहिलो हुनुभयो भने दोस्रोमा चाहिँ को होला त ?

– सरसर्ती हेर्दा नेकपा एमाले दोस्रोमा देखिएको छ तर मेरो आकलनमा नेकपा समाजवादी चाहिँ दोस्रो स्थानमा हुनुहुन्छ ।
 
एउटा मेयरको चुनावमा कति जति खर्च हुँदो रहेछ ?

– यो चुनाव धेरै हाईफाई खालको हुँदैन । हाम्रा कार्यकर्ताले झण्डा ब्यानरको व्यवस्था गर्न मात्र भनिरहनुभएको छ । अघिल्लो चुनावमा पनि वडाध्यक्ष उम्मेदवारहरूले मोटामोटी डेढ लाख रुपैयाँसम्म खर्च गर्नुभएको थियो । हाम्रा प्रतिबद्ध कार्यकर्ताहरू हुनुहुन्छ । उहाँहरूले हामीसँग केही पनि नमाग्ने भन्नुभएको छ । पार्टीले चुनाव जित्नुपर्छ अनि चुनाव जितेपछि तपाईंहरूले हाम्रो भावनालाई समेटेर काम गर्नुपर्छ भन्नुभएको छ उहाँहरूले । 

कतिपय ठाउँमा टिकटकै लागि ठूलो पैसा खर्च गरेको कुरा आइरहेको छ अनि तपाईंहरूले एक डेढ लाख रुपैयाँको भरमा चुनाव जित्न सक्नुहुन्छ त ?

– वडाध्यक्षमा लड्दा पनि मैले बढीमा त्यस्तै डेढ लाख खर्च गरेको थिएँ । त्यो पनि झण्डा ब्यानर सामान्य चिया खाजा खर्च हो । कार्यकर्ताहरूले अहिले मलाई भनिरहनुभएको छ – अहिले हामी तपाईंको एक पैसा खर्च गराउँदैनौं तर चुनाव जितिसकेपछि हामी तपाईंलाई दिन रात काममा दौडाउँछौं ।

तपाईंका बागी उम्मेदवार रामचन्द्र चौधरीले त तपाईं आर्थिक चलखेल गरेर टिकट पाउनुभएको भन्दा रहेछन् त !

– यो सरासर झूटो कुरा हो । अघिल्लो चुनावमा पनि यहाँ २ जना सशक्त उम्मेदवारहरू थिए । त्यसमा पनि रामचन्द्र दाइले टिकट पाउनुभयो । तपाईंले उहाँलाई सोध्दा हुन्छ – कति खर्च गरेर टिकट ल्याउनुभयो ? हाम्रो पार्टीका नगर सभापति कृष्ण यादवले सम्भावना बोकेको व्यक्तिलाई टिकट दिनुभएको हो । यसमा पैसाको चलखेल भएको भन्नु झूटो कुरा हो । रामचन्द्रले कति खर्च गरेर त्यतिखेर टिकट ल्याउनुभएको थियो, त्यो सार्वजनिक रूपमा भन्न सक्नुपर्‍यो । नत्र उहाँले आफूभन्दा कनिष्ठ भाइलाई कति पैसा खर्च गरेर टिकट ल्यायो भन्ने आरोप लगाउन मिल्दैन ।

तपाईंहरूको पार्टीको केन्द्रीय नेतृत्वले गठबन्धन मिलाउन भनेको छ । कसरी मिलाउनुहुन्छ ?

– यो चन्द्रपुर नगरपालिका रौतहट जिल्लाको ४ नम्बर क्षेत्रमा पर्छ । यहाँ हामीले तीनै तह जितेका छौं । हामीले नगरपालिका जितेका छौं । वडाहरूमा हाम्रो बहुमत छ । हाम्रो बहुमत भइरहेको ठाउँमा हामीले छाडेमा जनताले हामीलाई स्वीकार्दैनन् । दुईतिहाइ ल्याएको कम्युनिस्ट सरकारले काम गर्न नसकेकाले कांग्रेसले सरकार चलाइरहेको छ । अर्थात्, देशका लागि कांग्रेस नै आवश्यक पार्टी हो । यहाँ हामीलाई गठबन्धन जरूरी छैन । 

यसपालि मेयरको निर्वाचन जित्दा तपाईंलाई कति जति भोट आउने अनुमान गर्नुभएको छ ?

– यसपालिको चुनावमा हामीले १५ हजार भोटभन्दा माथि नै ल्याउनुपर्छ । त्यसका लागि हामीले वातावरण बनाइरहेका छौं । 

चुनाव प्रचार कसरी गरिरहनुभएको छ ?

– हामीले घरदैलो कार्यक्रम गरिरहेका छौं । हामी दशैवटा वडाका जनतामा कसरी प्रभावकारी रूपमा पुग्न सक्छौं भनी छलफल गरिरहेका छौं । 

चन्द्रपुरलाई रौतहट जिल्लाकै पहिलो दर्जाको नगरपालिका बनाउँछु भन्ने आत्मविश्वास कसरी प्राप्त गर्नुभयो ?

– जिल्लाका १६ नगरपालिकामध्ये सबभन्दा बढी विकास देखिएको चन्द्रपुर नगरपालिकामै हो । यहाँ भौतिक विकासले मात्र विकास भएको देखिँदैन । अहिले पनि हामीले सबै वडामा शुद्ध खानेपानी दिन सकिरहेका छैनौं । सरकारी विद्यालयहरूलाई निजी विद्यालयहरूसँग प्रतिस्पर्धा गर्न सक्ने बनाउनका लागि हामीले जमर्को गरिरहेका छौं । हामी तल्लो वर्गका मानिसलाई पनि अपनत्व महसूस हुने गरी काम गर्न तत्पर छौं । 

यहाँ नाला ढलको पनि समस्या छ । यहाँको अव्यवस्थित शहरीकरणलाई हामीले सुधार गर्न सकेका छैनौं । यहाँ बसाइँ सरेर आउनेको संख्या जानेकोभन्दा बढी छ । यहाँ जनसंख्याको चाप धेरै बढिसकेको छ, यसलाई व्यवस्थितगर्न जरूरी छ । 

मेरो वडामा १२ किलोमिटर जति बाटो पर्छ । त्यसमध्ये मोटामोटी ८ किलोमिटर जतिमा मैले कालोपत्रे गराएको छु । वडा कार्यालयको भवन पनि थिएन, त्यो निर्माण गरियो । त्यस्तै सामुदायिक भवन पनि बनाइयो । 

एउटा विद्यालय चल्न नसकेर अर्कोमा गाँभिने अवस्था थियो । मैले शिक्षकको दरबन्दी मिलाएर त्यसलाई जीवित राख्न योगदान गरेको छु । अहिले त्यसमा २००–३०० विद्यार्थी छन् ।

त्यस्तै अस्पताल पनि जीर्ण अवस्थामा थियो । सफासुग्घर गर्ने मान्छे पनि थिएनन् । वडाबाट २–३ जना कामदार मैले सरसफाइका लागि व्यवस्थापन गरेको छु । अझै कामहरू गर्न बाँकी छन् । मैले गरेका कामहरू जनताले देख्नुभएको छ । त्यसैले मलाई मेयर पदमा उठ्न आत्मविश्वास दिएको छ ।