काठमाडौैं, २९ असार –अख्तियार दुरुपयोग अनुसन्धान आयोगले तत्कालिन कर फस्र्योट आयोगका पदाधिकारीविरुद्ध बिहीवार विशेष अदालतमा मुद्दा पेश गरेको छ ।

विशेष अदालतका रजिष्ट्रार भीम श्रेष्ठका अनुसार, आयोगका तीनै जना पदाधिकारीविरुद्ध १० अर्ब ९७ करोड रुपैयाँको बिगो दावी गरिएको छ ।

समय अभावका कारण ती पदाधिकारीविरुद्धको मुद्दा बिहीवार दर्ता हुन पाएन । शुक्रवार उक्त मुद्दा दर्ता हुने अदालतले जनाएको छ ।

अर्बौंको राजश्व छुट दिएर राज्यलाई नोक्सानी पुर्याएको अभियोगसहित अख्तियारले गत जेठ १९ गते शर्मालाई आन्तरिक राजश्व विभागबाटै पक्राउ गरेको थियो । त्यसयता विभिन्न पटक समय थप्दै उनीमाथि अख्तियारले अनुसन्धान अघि बढाएको थियो ।

लुम्बध्वज महत अध्यक्ष र शर्मा र उमेश ढकाल सदस्य रहेको उक्त कर फस्र्योट आयोगमार्फत झण्डै २१ अर्ब रुपैयाँ कर मिनाहा दिएको भन्दै महालेखाले ती अधिकारीमाथि छानविन गर्न भनेको थियो ।

गत जेठमा शर्मालाई पक्राउ गरेसँगै अन्य दुई पदाधिकारी भने अहिलेसम्म पनि फरार छन् । उनीहरुमाथिको खोजी कार्य अघि जारी रहेको अख्तियारले जनाएको छ ।

मंगलवारमात्र शर्माकी श्रीमती कल्पना उप्रेती शर्माले सर्वोच्च अदालतमा बन्दी प्रत्यक्षीकरण अन्तर्गत रिट दायर गरेकी थिइन् । उक्त रिटमाथि बुधवार सर्वोच्च अदालतले कारण देखाउ आदेश जारी गर्दै अदालतमा उपस्थित गराउन निर्देशन दिएको थियो ।