विराटनगर महानगरपालिकाको उपप्रमुख पदमा नेकपा एमालेबाट उम्मेदवार बनेकी शिल्पा निराला कार्कीको उम्मेदवारी खारेजीे माग गर्दै सर्वाेच्चमा अदालतमा रिट दर्ता भएको छ । निर्वाचन आयोगविरुद्ध पनि रिट परेको छ । आचारसंहिताको निर्देशिका उल्लंघन गरेको भन्दै आयोगविरुद्ध पनि रिट दर्ता भएको हो । 

मोरङको मुख्य निर्वाचन अधिकृतको कार्यालय, निर्वाचन आयोग काठमाडौं र एमाले उम्मेदवार कार्कीविरुद्ध विराटनगर महानगरका उपमेयर पदका उम्मेदवार अमरेन्द्र यादवले सर्वाेच्चमा परमादेश माग्दै रिट दर्ता गराएका हुन् ।

कार्कीले कोशी अस्पाताल विकास समितिको सदस्य पदबाट राजीनामा नदिई उम्मेदवारी दिएको भन्दै विराटनगरस्थित मुख्य निर्वाचन अधिकृतको कार्यालयमा यादवले उम्मेदवारी खारेजी माग गर्दै उजुरी दिएका थिए । 

निर्वाचन कार्यालयले उजुरकर्ताको मागदाबी नपुगेको जनाएको थियो । सर्वाेच्चमा सोमवार नै रिट दर्ता भएको यादवले बताए । 

अन्तरिम आदेश जारी नगरी मुद्दा लम्बिएर दाबी प्रमाणित भएमा भने कार्की विजयी भए पनि पद खारेज हुने यादवका अधिवक्ता पेशल आचार्यले बताए । 

कोशी अस्पताल विकास समिति सदस्यमा बहाल रहेको अवस्थामा उम्मेदवारी दिएकी कार्कीले त्यसविरुद्ध निर्वाचन कार्यालयमा उजुरी परेपछि २०७९ वैशाख ९ गतेको मिति राखेर राजीनामा अस्पतालमा बुझाएकी थिइन् । 

अस्पताल विकास समिति सदस्यको राजीनामा स्वास्थ्य मन्त्रालयले स्वीकृत गर्ने कानूनी प्रावधान  छ । उम्मेदवार कार्कीले अस्पताल पुगेपछि मात्रै राजीनामा मन्त्रालयमा बुझाउने थाहा पाएकी थिइन् । ११ वैशाखमा मन्त्रालयमा राजीनामा दर्ता गरेको प्रतिलिपि निर्वाचन कार्यालयमा पेश गरेकी थिइन् ।

कार्कीले निर्वाचन कार्यालयमा पेश गरेको राजीनामाको दर्ता नम्बर नै कीर्ते भएको मन्त्रालयले पुष्टि गरिदिएको छ । मन्त्रालयका सूचना अधिकारी गणेश श्रीवास्तवले उपलब्ध गराएको आधिकारिक सूचना विवरणअनुसार कार्कीले राजीनामा स्वीकृत गरेको मिति र दर्ता नम्बरमा उक्त दिन मन्त्रालयको मूल दर्ता किताबमा सूर्य नेपाल प्रालि काठमाडौंको सूर्तीजन्य पदार्थ ऐनबारेको कागजात दर्ता भएको छ । 

वैशाख १२ गते उपप्रमुखमा उम्मेदवारी दर्ता गर्दा अस्पताल विकास समिति सदस्यबाट राजीनामा नदिएको भन्दै यादवले उजुरी दिएका थिए । उजुरीपछि उनले वैशाख ११ गते नै स्वास्थ्य तथा जनसंख्या मन्त्रालयमा राजीनामा बुझाएको भन्दै ७२९९ नम्बरको दर्ता नम्बरसहितको प्रतिलिपि आयोगमा बुझाएकी थिइन् ।

कार्कीले बुझाएको कागजातको आधारमा मुख्य निर्वाचन अधिकृतको कार्यालयले उनको उम्मेदवारी सदर गरिसकेको छ । मन्त्रालयको दर्ता किताबमा ७२९९ नम्बरमा सूर्य नेपाल नामक कम्पनीको पत्र दर्ता भएको छ । मन्त्रालयले ७२७८, ७२९९ र ७३०० नम्बरको दर्ता नम्बरमा सूर्य नेपाल नामक कम्पनीको पत्र दर्ता रहेको पुष्टि गरेको हो ।

तत्कालीन प्रधानमन्त्री केपी शर्मा ओली नेतृत्वको सरकारले कार्कीलाई अस्पताल विकास समितिको सदस्यमा मनोनीत गरेको थियो । शेरबहादुर देउवा प्रधानमन्त्री भएपछि गत माघ २१ गतेको उनीसहित विकास समितिका सबै पदाधिकारीलाई पदमुक्त गरेकोमा कार्कीसहित पदाधिकारी अदालत गएका थिए । 

अदालतले पुनर्बहाली गरेपछि उनीहरू पदमै कार्यरत थिए । मुख्य निर्वाचन अधिकृतको कार्यालयमा वैशाख १३ गते उजुरी परेपछि उनले अस्पताल विकास समितिका अध्यक्ष महेश भट्टराईलाई वैशाख ९ गतेको मितिमा राजीनामा दिएकी थिइन् ।