धनगढी, २९ असार । कैलालीको अत्तरिया बजारमा रहेको नेचुरल ब्युटी होटेलमा बास बसेका प्रहरी जवान शेरबहादुर बुढा क्षेत्री आज होटलमै मृत फेला परेका छन् ।

भजनी नगरपालिका–४ घर भई इप्रका जोगबुढा डडेलधुरामा कार्यरत क्षेत्रीलाई आज बिहान मृत फेला पारिएको इप्रका अत्तरियाका प्रहरी निरीक्षक हिक्मतबहादुर बोहराले बताए । बुधबार उक्त होटलमा बास बसेका क्षेत्रीको शरीरमा कुनै घाउ र चोटपटक देखिँदैन ।
बिदा स्वीकृत गराई आफ्नो घर भजनी जाने क्रममा बाटामा पर्ने अत्तरियाको उक्त होटेलमा एक महिलासँगै उनी बास बसेको जनाइएको छ । ती महिलालाई सोधपुछका लागि प्रहरीले पक्राउ गरेको छ । प्रारम्भिक अनुसन्धानबाट हृदयाघातका कारण निजको निधन भएको हुन सक्ने प्रहरी निरीक्षक बोहराले बताए । यद्यपि घटना रहस्यमय देखिएको छ । शव परीक्षण गरी आफन्तलाई बुझाइएको छ ।