सिन्धुलीको   दुधौली   नगरपालिका–   ११,  टाँडीको  धनसरी  र  उदयपुरको  कटारी  नगरपालिका–१, बेल्सोत जोड्ने कमला नदीमा निर्माणाधीन यान्त्रिक पुल १२ वर्षदेखि अलपत्र अवस्थामा छ ।

निर्माण सामग्रीमा मूल्य वृद्धि भएका कारण देखाउँदै उक्त पुल निर्माणको अन्तिम चरणमा अलपत्र अवस्थामा राखिएको छ ।

स्थानीयका अनुसार धनसरीलाई पर्यटकीय क्षेत्र बनाउने मुख्य उद्देश्यसहित १८ महिनामा सक्ने  गरी  २०६६  साल  कात्तिकदेखि  पुल  निर्माण सुरु गरिएको थियो ।

करिब  ७०  लाख  रुपियाँको  लागतमा  निर्माण सुरु गरिएको उक्त पुल निर्माण कार्य पूरा गर्न अन्तिम चरणमा आएर करिब १० लाख रुपियाँ नपुगेर अलपत्र परेको निर्माण उपभोक्ता समितिले जनाएको छ ।

निर्माण  उपभोक्ता  समितिका  अध्यक्ष  गुर्जबहादुर बुढाथोकीका अनुसार ६३५ मिटर उक्त पुलको लम्बाइको पुल निर्माणका लागि गरिबी  निवारण  कोष,  तत्कालीन  जिविस  सिन्धुली,  सम्बन्धित  गाविस,  संसद्  विकास  कोष र स्थानीय शीतली, बेल्सोत, हरियाली, नमुना सामुदायिक वन समितिबाट ७० लाख रुपियाँ  बजेट  जुटेको  थियो  ।

 २०६७  साल  फागुन महिनाभित्र सक्ने गरी पुल निर्माण सुरु भएको थियो । तर, बीचमा प्रतिबद्धता गरेको बजेट र पुल निर्माण सामग्री नआएर निर्माण रोकिएको उनले बताए । गोरखापत्र दैनिकमा खबर छ ।