बेलायती गुप्तचर संस्था एमआई६का पूर्वप्रमुख सर रिचर्ड डियरलभले रुसका राष्ट्रपति भ्लादिमिर पुटिनलाई सन् २०२३ मा सत्ताच्युत गरिने र उनी दीर्घरोगबाट थलिएर अस्पतालमा भर्ना गरिने दाबी गरेका छन् । 

युक्रेन युद्धमा रुसले अनेकौं चुनौती बेहोर्नुपरेकाले पुटिनलाई अस्पताल पठाएर सत्ताबाट हटाउने बाटो खोलिनसक्ने डियरलभको भनाइ छ । 

सन् १९९९ देखि २००४ सम्म एमआई६को नेतृत्व गरेका डियरलभले वन डिसिजन नामक पोडकास्टको एक एपिसोडमा यो भविष्यवाणी गरेका हुन् । 

पुटिन सत्ताबाट बाहिरिएपछि उनको उत्तराधिकारीका विषयमा कुनै योजना मस्कोले नबनाएको डियरलभले बताए । तर पुटिनको ठाउँमा सुरक्षा परिषद्का सचिव निकोलाइ पात्रुशेभलाई ल्याउन सकिने डियरलभको भनाइ छ ।

पुटिनको स्वास्थ्य राम्रो नरहेको विषयमा अनेकौं अनुमान गरिएका छन् । पश्चिमी कूटनीतिकर्मी तथा गुप्तचर वृत्तमा पुटिनलाई डिमेन्सिया, पार्किन्सन्स डिजीज र रक्त क्यान्सर जस्ता रोग लागेको चर्चा छ ।