०९ साउन २०८३, शनिबार
सुन्दरी प्रतियोगिताको आडमा महिलामाथि यौन दुर्व्यवहार गर्ने मनोज पाण्डेसँग सरकारी वकिलको कार्यालयले बयान लिएको छ ।
बुधवार उनलाई जिल्ला प्रहरी परिसर काठमाडौंका अनुसन्धान अधिकृत र जिल्ला सरकारी वकिलको कार्यालयका अधिकारीहरूले बयान लिएका हुन् । बलात्कारको अभियोग लागेका मनोज पाण्डेले आफूले बलात्कार नगरेको भन्दै अस्वीकारी बयान दिएका छन् ।
स्रोतका अनुसार पाण्डेले कसम खाँदै ‘मैले गरेको हैन’ भन्ने बयान दिएका छन् । प्रहरीले पक्राउ गरेपछिको प्रारम्भिक बयानमा यदि ‘आफूले बलात्कार गरेको भए झुन्डिएर मर्छु’ भनेको अनुसन्धानमा खटिएका प्रहरी अधिकारीले लोकान्तरलाई बताए ।
अहिले प्रहरीले उनीविरुद्ध प्रमाणहरू जुटाइरहेको छ ।
पीडित युवतीले आफूमाथि अत्याचार भएको भन्दै कल गरेकी पूर्व मिस नेपाल माल्भिका सुब्बासँग पनि प्रहरीले बयान लिएको थियो ।
बयानमा माल्भिकाले पीडित युवतीले फोन गरेको स्वीकारेकी छिन् । उनले त्यो समयमा आफू पनि समस्यामा भएका कारण ध्यान पुग्न नसकेको कुरा प्रहरीलाई बताएकी छन् ।
यसले प्रहरीलाई परिस्थितिजन्य प्रमाण जुटाउनलाई सहयोग पुगेको छ । प्रहरी प्रमाण जुटाउने क्रममा त्यो समयका फोटोहरू पनि संकलन गरिरहेको स्रोतले लोकान्तरलाई बतायो ।
प्रहरीले बलात्कार अभियोगमा हदम्यादका कारण उनलाई पक्राउ गर्न नमिल्ने भएपछि मानव बेचबिखन तथा ओसारपसारको अभियोगमा जिल्ला अदालतबाट ५ दिनको म्याद थप गरेर अनुसन्धान गरिरहेको छ ।
सन् २०१४ मा भएको ‘मिस ग्लोबल इन्टरनेसनल’ प्रतियोगितामा सहभागी एक युवतीलाई होटलमा बोलाएर बलात्कार गरेको आरोपमा पाण्डेलाई प्रहरीले जेठ ७ गते पक्राउ गरेको थियो ।
पाण्डेले बलात्कारपछि फोटो र भिडियो खिचेर ‘ब्ल्याकमेल’ गर्दै ६ महिनासम्म निरन्तर यौन शोषण गरेको घटना पीडितले सार्वजनिक गरेपछि घटनाबारे छानबिन गर्न दबाब बढेको थियो ।
यस विषयमा बालुवाटारस्थित प्रधानमन्त्री कार्यालयअगाडि अधिकारकर्मीहरूले आन्दोलन गरेका थिए ।
संसद्मा समेत बलात्कारको विषयमा आवाज उठेपछि सभामुख अग्निप्रसाद सापकोटाले यस विषयमा सरकारलाई रुलिङ गरेका थिए ।
त्यसपछि सरकारले काठमाडौं उपत्यका अपराध अनुसन्धान कार्यालयका प्रमुख एसएसपी वसन्त कुँवरसहित ५ जनाको समिति बनाएको थियो ।
त्यो टोलीले पाण्डेलाई पक्राउ गरेको थियो । प्रहरीको परामर्शमा पीडित युवतीलाई जिल्ला अदालतमा निवेदन दिन लगाएर बयान प्रमाणित गरिएको थियो ।
आफूलाई यौन दुर्व्यवहार गरेको भन्दै १६ वर्ष कम उमेरकी एकजना बालिकाले पाण्डेविरुद्ध प्रहरीमा जाहेरी दिएकी छन् ।
अहिले सरकारले बलात्कार मुद्दामा १ वर्षको हद म्यादलाई पुनर्विचार गर्न विभिन्न संसदीय समिति र कानून विज्ञहरूसँग परामर्श गरिरहेको छ ।
यो केसबाहिर आएपछि काठमाडौं उपत्यकालगायत देशभरमा बलात्कारका घटनाहरू बाहिर आउन थालेका छन् ।
