आइतवार बिहानैदेखि काठमाडौं उपत्यका लगायतका स्थानमा सामान्य वर्षा भइरहेको छ ।

हाल नेपालमा स्थानीय वायु, भारतको  उत्तर प्रदेश, विहार आसपास रहेको न्यून चापीय रेखा र पश्चिमी वायुको प्रभाव रहेकाले वर्षा निरन्तर रहेको मौसम विभागले जनाएको छ। 

विभागका अनुसार हाल मुलुकमा आंशिक देखि  सामान्य बदली  रही बागमती, गण्डकी प्रदेश र सुदूरपश्चिम प्रदेशका थोरै स्थानहरूमा मेघ गर्जन तथा चट्याङ्ग सहित हल्का देखि मध्यम वर्षा भइरहेको छ।

आज दिउँसो प्रदेश १, बागमती प्रदेश र गण्डकी प्रदेश लगायत देशका पहाडी भू-भागमा आंशिक देखि  सामान्य बदली  रहि बाँकी भू-भागमा आंशिक बदली रहने विभागले जनाएको छ ।

प्रदेश १, बागमती प्रदेश र गण्डकी प्रदेशका केही  स्थानहरुमा र बाँकी भू-भागका थोरै स्थानहरूमा मेघ गर्जन  तथा चट्याङ्ग  र हावा हुरी सहित हल्का देखि मध्यम वर्षाको सम्भावना रहेको छ।

आज राति प्रदेश १, मधेश प्रदेश, बागमती प्रदेश र गण्डकी प्रदेशमा आंशिक देखि  सामान्य बदली  रही बाँकी भू-भागमा आंशिक बदली  देखि मौसम सामान्यतया सफा रहनेछ। प्रदेश १, मधेश प्रदेश, बागमती प्रदेश र गण्डकी प्रदेश थोरै स्थानहरुमा मेघ गर्जन तथा चट्याङ्ग  र  हावाहुरी सहित हल्का देखि मध्यम वर्षाको सम्भावना रहेको  विभागको भनाइ छ ।

प्रदेश १, मधेश प्रदेश, बागमती प्रदेश र गण्डकी प्रदेश  लगायत देशका पहाडी भू-भागका केही  स्थानहरुमा मेघ गर्जन तथा चट्याङ्ग  र  हावा हुरी सहित हल्का देखि मध्यम वर्षाको सम्भावना रहेकोले आवश्यक सतर्कता अपनाउन विभागले अपिल समेत गरेको छ।