१० साउन २०८३, आइतबार
अर्थमन्त्री जनार्दन शर्माले चन्द्रागिरी–चित्लाङ–पालुङ–चितवन द्रूतमार्गको प्रारम्भिक अध्ययन भएरै बजेट राखिएको बताएका छन् ।
सोमवार अर्थ मन्त्रालयमा आयोजित आगामी आर्थिक २०७९/८० को बजेटपछिको कार्यक्रममा शर्माले द्रूतमार्गको आवश्यक अध्ययन भइसकेको बताए । यो द्रूतमार्ग निर्माण गर्न सकिने र सहजै कार्यान्वयन हुने आयोजना भएको उनले बताएका छन् ।
पहिलो चरणमा चन्द्रागिरी–चित्लाङ–पालुङ–चितवन द्रूतमार्ग निर्माण गर्दै दोस्रो चरणको अध्ययन लगानी बोर्डले शुरू गर्ने उनले बताए ।
दोस्रो चरणमा चितवन–रामपुर–बुटवल, चितवन–रामपुर पोखरासम्मको दू्रतमार्ग निजी क्षेत्रको लगानीमा निर्माण गर्ने लगानी बोर्डमार्फत प्रक्रिया अगाडि बढाइने योजना अर्थमन्त्री शर्माले आगामी आवको बजेट वक्तव्यमार्फत उल्लेख गरेका छन् ।
कार्यक्रममा अर्थमन्त्री शर्माले आगामी वर्ष उत्पादन बढाउन र कृषि क्षेत्रलाई प्रवद्र्धन गरेर आयात कम गर्दै जाने नीति लिएको पनि बताए । उनले भने, ‘कति बाहिरबाट ल्याएर खाने ? लौका घिरौलासम्म त नेपालमै उत्पादन हुनुपर्ने र यहीको खानुपर्छ ।’
हरेक परिवारले गमलामा रोपेरै आफूलाई पुग्ने खुर्सानी फलाउन सक्ने तथा साग उत्पादनमा जोड दिनुपर्ने पनि शर्माले बताए ।
कृषि उत्पादन बढाउनकै लागि यसअघि जम्मा १५ वर्षलाई मात्रै दिने गरिएको उद्योग खोल्ने जग्गा भाडालाई अब ५० वर्षलाई दिइने भएको छ । यसले उद्योगीको मनोबल बढ्ने र उत्पादन बढाउन केन्द्रित हुने बुझाइ पनि शर्माको छ ।
अर्थ मन्त्रालयले बजेटको बुँदा नम्बर ७२ संशोधन गरेको छ । आगामी आर्थिक वर्षको बजेटको ७२ नम्बर बुँदामा वार्षिक १० करोड रुपैयाँभन्दा बढीको विद्युत् खपत गर्ने उद्योगलाई विद्युत् महशुलमा २ देखि १५ प्रतिशतसम्म छुट दिने व्यवस्था छ । यो व्यवस्था बजेट वक्तव्यमा मासिक हुन गएकाले संशोधन गरिएकाे पनि अर्थमन्त्री शर्माले बताएका छन् ।
अर्थमन्त्री शर्माले चालू आवमै कोभिड प्रभावित मजदुरलाई राहत स्वरूप प्रतिपरिवार १० हजार रुपैयाँ दिने व्यवस्था गरेका थिए । नगद दिने कार्यक्रम नेपालमा पहिलो अभ्यास भएकाले एकपक्षले राम्रो र अर्को पक्षले नराम्रो भनेकै कारण कार्यान्वयन पक्ष फितलो भएको पनि बताए ।
कार्यक्रम आंशिक रूपमा मात्रै लागू भएको छ भने पूर्ण कार्यान्वयन चुनावकै कारण गर्न नसकिएको स्वीकार शर्माले गरेका छन् ।
अर्थमन्त्री जनार्दन शर्माले बजेटभन्दा सबैको ध्यान मेरो गाउँको बाटोमा पर्यो वा परेन भन्नेमा भन्ने गरेको तर यो सोचाइ देश विकासमा हुनुपर्ने बताए । ‘बजेट गाउँको बाटो मात्रै होइन, गाउँको रोजगारी पनि हो,’ उनले भने ।
अर्थमन्त्री शर्माले हामीले आगामी आर्थिक वर्षको बजेट हामीसँग भएका स्रोतको अधिकतम प्रयोग गर्दै रोजगारी बढाउने, पूर्वाधार विकास गर्ने, आयात प्रतिस्थापन गर्ने गरी बजेट ल्याएको बताएका छन् ।
