०६ साउन २०८३, बुधबार
बुटवलका युवा उद्यमी कृष्णप्रसाद बस्याल जहाँ जाँदा पनि आफ्नै गाडी प्रयोग गर्थे । आफैँ ‘ड्राइभ’ गर्थे ।
आफ्नै गाडीमा आउजाउ गर्ने बस्याल केही दिनअघि भने भैरहवाबाट हवाईजहाजमा व्यावसायिक कामका लागि काठमाडौं गएका थिए । उनी शनिवार साँझ सार्वजनिक गाडीमा बुटवल फर्किँदै थिए ।
उनी चढेको गाडी चितवन नारायणगढ आइपुग्दा बिग्रियो । तर, गाडी मर्मत गरेर अगाडि बढ्न समय लाग्ने भएपछि उनी जनकपुरबाट भैरहवा आउँदै गरेको गाडीमा चढे ।
बिग्रिएको गाडी छाडेर छिटो घर आउने बस्यालको चाहना भने पूरा हुन सकेन ।
आइतवार बिहानै उनी चढेको जनकपुरबाट आएको लु २ ख ३८४१ नम्बरको गाडी रुपन्देहीको रोहणी पुलबाट खस्यो, जहाँ बस्यालको मृत्यु भयो ।
सानै उमेरबाट व्यवसाय गर्दै आएका बस्याल बुटवल कालीकानगरमा प्रतिष्ठित हार्डवेयर व्यवसायीको रुपमा परिचित थिए ।
बस्यालको बुटवल–११ कालीकानगरमा बस्याल हार्डवेयर सञ्चालनमा छ ।
