काठमाडौं , ६ साउन- काठमाडौं उपत्यकाभित्र सडक बिस्तारका क्रममा परेका खाल्डाखुल्डी र जताततैका भ्वाङ पुर्न सुरु गरिएको छ । सडक बिस्तारका क्रममा खनिएका खल्डा पुर्न वेवास्ता गरेका कारण सर्वसाधारणले ज्यानै समेत गुमाएपछि बल्ल तातेका सरोकारवाला निकायले भ्वाङ पुर्ने कार्य तिव्र बनाइएको जनाएका छन् ।
प्रधानमन्त्री शेरबहादुर देउवाले १५ दिनभित्र खाल्डाखुल्डी पुर्न कडा निर्देशन दिएसँगै पुर्न सुरु गरिएको हो । प्रधानमन्त्री देउवाको निर्देशनपछि खाल्डाखुल्डी पुर्ने कामको समन्वय गर्न प्रधानमन्त्री तथा मन्त्रिपरिषद्को कार्यालयका सचिव चन्द्रकुमार घिमिरेको संयोजकत्वमा संयन्त्र गठन भएको छ । मेलम्चीको खानेपानी वितरणका लागि काठमाडौं उपत्यका खानेपानी लिमिटेड आयोजना कार्यान्वयन निर्देशनालयले पाइप बिच्छ्याएर खाल्डाखुल्डी नै छाडेको थियो । मनसुनको समय भएकाले थप ठाउँमा पाइपलाइनको कार्य गर्दा सर्वसाधारण तथा सवारीसाधनको आवागमनमा असर पर्ने भन्दै बाँकी क्षेत्रमा सडक खन्नका लागि बन्द गरिएको छ, राजधानी दैनिकमा खबर छ ।