गृहमन्त्री बालकृष्ण खाणले नेपालको भूमि कुनैपनि विदेशी राष्ट्रको विरुद्ध प्रयोग हुन नदिने प्रतिबद्धता जनाएका छन् । प्रतिनिधि सभामा विनियोजित विधेयक माथि सांसदहरुले उठाएका प्रश्नको जवाफका क्रममा मन्त्री खाणले नेपाली भूमि कुनै देशको विरुद्ध प्रयोग हुन नदिने बताएका हुन् । 

‘नेपालको भूमिमा कुनैपनि विदेशी राष्ट्रको विरुद्ध हुने गतिविधि हुन दिँदैनौँ, यो सरकारको निरन्तरताको अभ्यास र दृढता हो,’ मन्त्री खाणले भने । नेपाल भ्रमण गरेकी अमेरिकी उपविदेशमन्त्री उज्रा जियाले ललितपुरको एकान्तकुनास्थित तिब्बती शरणार्थी क्याम्पको भ्रमण गरेपछि चीनले आपत्ति जनाएको थियो । तिब्बती क्याम्पमा अमेरिकी विदेशमन्त्रीलाई भ्रमण गर्न दिएको भन्द्रै सरकारको आलोचना हुँदै आएको छ । 

प्रमुख प्रतिपक्षी दलका नेता एवं सांसदहरुले यो विषय संसदमा उठाएका थिए । बुधवार संसदमा जवाफ दिँदै मन्त्री खाणले नेपाली भूमि कसैकाविरुद्ध प्रयोग हुन नदिने राज्यको नीति निरन्तर रहेको बताए । 
मन्त्री खाणले तिब्बती शरणार्थीको मानव अधिकारको रक्षा गर्नु भने नेपालको दायित्व भएको बताए । कोभिड १९ को भ्याक्सिन दिने क्रममा शरणार्थीले आफ्नो नाम र बासस्थान टिपाएपछि सहज ढंगले खोप उपलव्ध गराइएको उनले बताए । 

माओवादीका गिरिराजमणि पोखरेलले तिब्बती शरणार्थी सम्बन्धी अमेरिकी उपविदेशमन्त्रीले तिब्बती शरणार्थीको मानव अधिकार उल्लघंन गरेको भनेर दिएको वक्तव्यबारे नेपालले किन खण्डन नगरेको भनेर प्रश्न गरेका थिए ।

थप

ब्याच मिचेर आईजीपी बनाइएको होइनः गृहमन्त्री