१० साउन २०८३, आइतबार
नेकपा एमालेको उपाध्यक्षबाट राजीनामा दिएर अहिले स्वतन्त्र रहेका राष्ट्रिय सभा सदस्य वामदेव गौतमले वामपन्थी आन्दोलनलाई एकीकृत गर्ने अभियानमा लाग्ने घोषणा गरेका छन् ।
केही समयमा घोषणा गरेर कम्युनिस्ट पार्टी एकीकृत गर्ने अभियानमा लाग्ने उनले बताए ।
शुक्रवार राष्ट्रिय सभा बैठकमा बोल्दै गौतमले फेरि पनि कम्युनिस्ट पार्टी एकजुट हुनुपर्ने आफ्नो विचार रहेको बताएका हुन् ।
‘केही समयदेखि म कुनै पनि पार्टीमा छैन, मेरो विचार कम्युनिस्ट फेरि एकजुट हुनुपर्छ भन्ने हो । त्यसैले कुनै नेताको बारेका टीकाटिप्पणी गरेको छैन,’ गौतमले भने ।
देशलाई समाजवादमा लैजाने औजारको रुपमा नेकपा गठन भए पनि सो पार्टी अहिले तीन टुक्रामा विभाजित भएकोले त्यो अवसर गुमेको उनले बताए । ‘म फेरि कम्युनिस्ट आन्दोलनाई एकीकृत गर्ने एउटा महाअभियानमा संलग्न हुने विचार गरेको छु, केही समयमा घोषणा गरेर काममा लाग्नेछु । सफलता प्राप्त हुन्छ हुँदैन थाहा छैन,’ गौतमले भने ।
२०७४ सालमा नेकपा एमाले र माओवादीबीच चुनावी तालमेल र पछि पार्टी एकता गर्ने बेलामा गौतमको मुख्य भूमिका रहेको थियो ।
