२३ असार २०८३, मंगलबार
अमेरिकाको सर्वाेच्च अदालतले गर्भपतनको संवैधानिक अधिकार खोसेको छ ।
सर्वाेच्च अदालतले ५० वर्षअघि ‘गर्भपतनको निर्णय लिने हक महिलामा रहेको’ भनेर गरेको फैसला उल्टी गरिएको छ ।
अन्तर्राष्ट्रिय सञ्चारमाध्यमका अनुसार पछिल्लो फैसलामा भनिएको छ, ‘संविधानले गर्भपतनको अधिकार दिएको छैन । हाम्रो तर्फबाट ‘रो वी वेड’ मुद्दा खारेज गरिएको छ ।
अमेरिकी अदालतले १९७३ मा गर्भपतनको हक दिएको थियो । उतिबेला भनिएको थियो, ‘गर्भलाई के गर्ने भन्ने हक महिलालाई हुन्छ ।’ यो फैसलासँगै अमेरिकामा सुरक्षित गर्भपतनको ढोका खुलेको थियो ।
अहिले गर्भपतनको हक खोसिएपछि देशभर तरङ्ग फैलिएको छ । अदालतको फैसलाप्रति असन्तुष्टि जनाउँदै सडक प्रदर्शन भइरहेका छन् ।
राष्ट्रपति जो बाइडेनले देशवासीलाई सम्बोधन गर्दै प्रदर्शन शान्तिपूर्ण गर्न आह्वान गरेका छन् । पूर्व राष्ट्रपति बाराक ओबामाले समेत अदालतको फैसलाप्रति असन्तुष्टि जनाएका छन् । उनले भनेका छन्, ‘अदालतले ५० वर्ष पुरानो आदेश उल्टी गरेको मात्रै छैन, अमेरिकीको निजी स्वतन्त्रतामाथि हमला गरेको छ ।’
