सत्ता गठबन्धनमा आबद्ध दलका महिला नेतृहरूले आसन्न प्रतिनिधि सभा/प्रदेश सभा निर्वाचनमा प्रत्यक्षतर्फ ३३ प्रतिशत सीट सुरक्षित गर्न माग गरेका छन् । 

प्रत्यक्ष चुनाव पुरुष लड्ने र महिला समानुपातिकमा बस्नुपर्ने परिभाषा बदल्न उनीहरूले माग गरेका छन् ।

आइतवार बसेको प्रतिनिधि सभा बैठकको विशेष समयमा महिला नेतृहरूले आगामी निर्वाचनमा प्रत्यक्षतर्फ नै महिलालाई ३३ प्रतिशत सीट चाहिने बताएका हुन् । नेपाली कांग्रेसकी पुष्पा भुसालले प्रतिनिधि सभामा ३३ प्रतिशत सीट महिलाको लागि सुनिश्चित गर्न माग गरिन् ।

नेकपा माओवादी केन्द्रकी रेखा शर्माले गठबन्धनमा कुरा मिलाउने नाममा महिलालाई कम सीट छुट्टाउन गठबन्धनको ध्यानाकर्षण गराइन् । 

‘गठबन्धनका कारण हालैको स्थानीय तह निर्वाचनमा उत्पीडित वर्गको सीट खोसिएको छ, आगामी चुनावमा प्रत्यक्षतर्फ नै ३३ प्रतिशत महिलालाई चाहिन्छ,’ शर्माले भनिन् । 

माओवादी केन्द्रकी अमृता थापाले स्थानीय तह निर्वाचनको क्रममा महिला ठगिएको भन्दै महिलालाई क्षतिपूर्ति दिनुपर्ने माग गरिन् । उनले प्रतिनिधि सभाको उपसभामुख र राष्ट्रिय सभाको उपाध्यक्ष अविलम्ब निर्वाचित गर्न माग गरिन् । 

राष्ट्रिय जनमोर्चाकी दुर्गा पौडेलले केही निर्वाचन क्षेत्र महिला महिलालाई लडाएर महिला जितेर आउने व्यवस्था सुनिश्चित गर्नुपर्ने माग गरिन् । उनले विदेशमा बस्ने नेपालीको लागि मताधिकार सुनिश्चित गर्नका लागि ऐन नै संशोधन गर्नुपर्ने बताइन् । 

नेकपा एमालेकी विन्दा पाण्डेले आगामी निर्वाचनमा प्रत्यक्षतर्फ महिलाको अधिकार सुनिश्चित गर्ने कानून ल्याउन सरकारसँग माग गरिन् । गठबन्धनको नाममा विद्यमान कानूनी व्यवस्थाविपरीत १६३ पालिकामा प्रमुख या उपप्रमुख महिला हुने अधिकार कटौती भएको बताइन् ।