रुसले बेलारुसलाई इस्कन्दर–एम नामक छोटो दूरीको क्षेप्यास्त्र प्रणाली उपलब्ध गराउने भएको छ । 

रुसका राष्ट्रपति भ्लादिमिर पुटिनले बेलारुसी समकक्षी अलेक्जेन्डर लुकाशेन्कोसँग शनिवार भेटघाटका क्रममा यो कुरा बताएका हुन् । 

‘निर्णय लिइसकेको छ । अबको केही महिनामा हामी बेलारुसलाई इस्कन्दर–एम ट्याक्टिकल क्षेप्यास्त्र प्रणाली उपलब्ध गराउँछौं । यसमा ब्यालिस्टिक र क्रुज क्षेप्यास्त्र दुवै प्रयोग गर्न मिल्छ । परम्परागत र आणविक हतियार दुवै यसमा राख्न मिल्छ,’ पुटिनले बताए । 

यस भेटघाटमा लुकाशेन्कोले पुटिनलाई बेलारुसी जेट विमानको स्तरोन्नति गर्नका लागि सहयोगको आग्रह पनि गरे । त्यसो गर्दा विमानमा आणविक वारहेड बोक्न सकिने लुकाशेन्कोको लक्ष्य छ ।

बेलारुसी हवाईक्षेत्र नजिक अमेरिका र नेटोले आणविक क्षमतायुक्त युद्धविमानहरूको प्रशिक्षण उडान गरिरहेकाले लुकाशेन्को चिन्तित छन् । 

पुटिनले यसमा सहयोग गर्ने बताएका छन् । तर बेलारुसी विमानको आधुनिकीकरण रुसका विमान कारखानाहरूमा गर्नुपर्ने उनको भनाइ छ । 

बेलारुसले पनि आणविक हतियार पाउन लागेपछि नेटो चिन्तित भएको छ । बेलारुसको बाटो भएर रुसले पोल्यान्डको सुलवाकी ग्यापमा कब्जा जमाउने पीर नेटोले लिएको छ । लिथुएनिया र पोल्यान्डको बीचमा रहेको त्यही सुलवाकी ग्यापले बेलारुसको भूभाग पनि छुन्छ । सुलवाकी ग्यापको पल्लो भागमा रुसी भूमि कालिनिनग्राड छ ।