०८ साउन २०८३, शुक्रबार
वाणिज्य, आपूर्ति तथा उपभोक्ता संरक्षण विभागले देशैभर एकै समयमा बजार अनुगमन गर्ने भएको छ ।
वाणिज्य तथा आपूर्ति मन्त्री दीलेन्द्रप्रसाद बडूको निर्देशनमा मन्त्रालयले सबै सम्बन्धित नियामक निकाय, जिल्ला प्रशासन, प्रदेश सरकार, उपभोक्ता अधिकारसँग सम्बन्धित निकायसँगको समन्वयमा बजार अनुगमन गर्ने निर्णय गरेको हो ।
वाणिज्य मन्त्रालयले निरीक्षण अधिकृत तोकेरै बजार अनुगमनमा खटाउने भएको छ । मन्त्रालयको समन्वयमा प्रदेशदेखि स्थानीय तहसम्मले बजार निरीक्षण अधिकृत तोक्ने र उनीहरूले उपभोक्ता संरक्षण ऐन तथा नियमावलीअनुसार बजार अनुमगन गर्ने भएका छन् ।
बजार अनुगमनका लागि भन्सार विभागबाट वस्तु, गुणस्तर र लेबलिङसमेत हेरेर मूल्यांकन तथा जाँचपासको व्यवस्था मिलाउने काम हुनेछ । अनुगमनको विवरण हरेक साता सञ्चारमाध्यमबाट सार्वजनिक हुनेछ ।
औषधिजन्य वस्तुको बजार अनुगमन औषधि व्यवस्था विभागले गर्ने भएको छ । यसका साथै सरकारी उपभोक्तासँग सम्बन्धित सार्वजनिक संस्थाले आफ्नो उत्पादन र वस्तुहरूको जानकारी वेबसाइटबाटै दिनुपर्ने निर्णय वाणिज्य मन्त्रालयको उपभोक्ता हित संरक्षण विभागले गरेको छ ।
