प्रतिनिधि सभाको बुधवारको बैठकमा गणपूरक संख्या नपुगेपछि कार्यसूचीमा रहेका सबै प्रस्ताव हटाइएको छ ।

सांसद झपटबहादुर रावलले गणपूरक संख्याको गणना गर्न माग गरेपछि सभामुख अग्निप्रसाद सापकोटाले ३ मिनेट घण्टी बजाई संख्या यकिन गर्न निर्देशन दिए । ३ मिनेटसम्म घण्टी बजाई संख्या यकिन गर्दा कुनै पनि प्रस्ताव पारित हुनका लागि सांसदको कूल उपस्थित संख्या एक चौथाइ अर्थात् ६९ हुनुपर्नेमा ६७ मात्रै रह्यो । 

यसअघि पनि त्यस्तै अवस्था आएकाले सभामुखले १५ मिनेटका लागि संसद् बैठक स्थगित गरेका थिए । तेस्रो पटक पनि गणपूरक संख्या नपुगेपछि सभामुख सापकोटाले कार्यसूचीमा रहेका सबै कार्यक्रम हटाइएको जानकारी दिए ।

त्यसअघि बैठकले ‘तेजाब तथा अन्य घातक रासायनिक पदार्थ (नियमन) विधेयक २०७९’ लाई पारित गरेको थियो । गृहमन्त्री बालकृष्ण खाँणले विधेयक पारित गरियोस् भन्ने प्रस्ताव गरेका थिए ।

प्रतिनिधि सभाको अर्को बैठक असार २३ गते दिउँसो २ बजे बस्नेछ ।