विराटनगर । बलात्कार आरोपमा धनकुटाको शहीदभूमि गाँउपालिका वडा नम्बर ५ का वडा अध्यक्ष  सन्तोष राई पक्राउ परेका छन् ।

जबरजस्ती करणी गरेको भन्दै युवतीले उजुरी दिएपछि प्रहरीले शनिवार राति राईलाई नियन्त्रणमा लिएको जिल्ला प्रहरी कार्यालय धनकुटाका प्रहरी उपरिक्षक लक्ष्मीराज अधिकारीले जानकारी दिए । 

उजुरी परेपछि धनकुटा बजार क्षेत्रबाट राति ११ बजे वडाअध्यक्ष राईलाई नियन्त्रणमा लिइएको उनले बताए । 

असार २४ गते होटल लगेर बन्धक बनाएको भन्दै युवतीले जिल्ला प्रहरी कार्यालय धनकुटामा उजुरी दिएकी थिइन् ।

तेह्रथुमको वसन्तपुरमा रहेको ताप्लेजुङ होटलमा बन्धक बनाएर बलात्कार गरेको युवतीले आरोप लगाएकी छन् । 

हिले घुम्न जाँउ भनी वसन्तपुरमा पुर्‍याएर होटलमा बन्धक बनाएर बलात्कार गरेको प्रहरीमा दिएको उजुरीमा उनले उल्लेख गरेकी छन् । 

युवती हिलेसम्म स्कुटरमा आएकी थिइन् ।

हिलेमा दुवै जना भेट भएपछि तेह्रथुमको लसुनेसम्म घुम्न सँगसँगै गएको प्रहरीको प्रारम्भिक अनुसन्धानबाट खुलेको प्रहरीले जनाएको छ । 

घटनास्थल तेह्रथुम भएकाले राईलाई तेह्रथुम पठाउने तयारी भइरहेको धनकुटा प्रहरीले जनाएको छ । 

राईले नेपाली कांग्रेसबाट वडाअध्यक्षमा जितेका हुन् ।