राष्ट्रिय प्रजातन्त्र पार्टी (राप्रपा)निकट राष्ट्रिय प्रजातान्त्रिक विद्यार्थी संगठन (राप्रविसं)ले विद्यालय तहको पाठ्यपुस्तक तत्काल उपलब्ध गराउन सरकारको ध्यानाकर्षण गराएको छ । 

राप्रविसंले शिक्षामन्त्री देवेन्द्र पौडेललाई भेटेर पाठ्यपुस्तक तत्काल उपलब्ध गराउन माग गरेको हो । संगठनले कक्षा १२ सम्मको शिक्षा निःशुल्क गर्न, शिक्षाको नाममा भइरहेको व्यापार नियन्त्रण गर्न र सामुदायिक विद्यालयको स्तरोन्नति गर्न माग गरेको छ । 

संगठनका अध्यक्ष धनसुर शाहीले सनातन धर्मविरुद्धका विषयहरुको पठनपाठनमा तत्काल रोक लगाउन पनि मन्त्री पौडेलसँग माग गरिएको जानकारी दिए । 

असार १ गते प्रधानमन्त्री शेरबहादुर देउवालाई राजनीतिक, समसामयिक र जनजीविकासँग सम्बन्धित २२ बुँदे ज्ञापनपत्र बुझाएको राप्रपाले आफ्नो माग सम्बोधन गराउन १३ गतेदेखि दबावमूलक कार्यक्रम सञ्चालन गर्दै आएको छ ।