रुसी क्षेप्यास्त्रहरूले मध्य युक्रेनमा रहेको भिन्नीत्सिया शहरमा आक्रमण गर्दा कम्तीमा १२ जनाको मृत्यु भएको छ । 

सर्वसाधारणहरू बस्ने भवन र एक सांस्कृतिक केन्द्रमा आक्रमण गरिएको युक्रेनीहरूले दाबी गरेका छन् । घटनामा ५० जना जति घाइते भएको चिकित्सकहरूको भनाइ छ । 

युद्ध चलिरहेको मोर्चाभन्दा निकै पर गरिएको आक्रमणको बेलामा सडकमा प्रशस्त मानिसहरू थिए । 

युक्रेनका राष्ट्रपति भोलोदीमीर जेलेन्स्कीले यस आक्रमणको निन्दा गर्दै भने, ‘प्रत्येक दिन रुसले सर्वसाधारणहरूलाई नष्ट गरिरहेको छ र युक्रेनी बालबालिका मारिरहेको छ । यो आतंकवादको नांगो नाच नभए के हो ?’

कृष्ण सागरबाट प्रहार गरिएका सातवटा क्रुज क्षेप्यास्त्र भिन्नीत्सिया शहरमा प्रहार गरिएको बताइएको छ । तीमध्ये चारवटालाई युक्रेनी हवाई प्रतिरक्षाले रोकेका थिए ।

प्रेमेहोई स्क्वेयरमा रहेको हाउस अफ अफिसर्स भवनमा आक्रमण भएको बताइएको छ । सोभियतकालीन उक्त कन्सर्ट हलमा सांस्कृतिक र सामाजिक कार्यक्रम आयोजना गरिने गरेको स्थानीयहरूको भनाइ छ ।