३० असार २०८३, मंगलबार
युवा तथा खेलकुद मन्त्री महेश्वर गहतराज (अथक)ले निर्माणाधीन मूलपानी अन्तर्राष्ट्रिय क्रिकेट रंगशालाको अनुगमन गर्नुभएको छ । निरीक्षणका लागि सोमवार बिहान मूलपानी पुगेका मन्त्री अथकले रंगशालाको निर्माण कार्य युद्धस्तरमा अघि बढाउन निर्देशन दिए ।
मन्त्री अथकले आगामी २ वर्षभित्रै सम्पन्न हुने गरी निर्माण कार्य अगाडि बढाउन निर्देशन दिए । उनले गुणस्तरियताका लागि प्राविधिक पाटोलाई समेत ख्याल गर्न निर्देशन दिएका छन् ।
मन्त्रालयका सचिव डा. दामोदर रेग्मी र राष्ट्रिय खेलकुद परिषदका सदस्य सचिव टंकलाल घिसिङसहित रंगशालाको निरीक्षणमा पुगेका मन्त्री अथकले खेलकुदलाई उद्योगको रूपमा विकास गर्नुपर्ने बताउँदै त्यसका लागि सबै खेलप्रेमीको इमान्दार प्रयासको आवश्यकता रहेको बताए ।
अनुगमनका क्रममा मन्त्री अथकले त्यहाँ अभ्यासरत खेलाडीहरूसँग भेटघाट गरी उनीहरूको हौसला समेत बढाएका थिए ।
