काठमाडौंको सिभिल सेभिङ एन्ड क्रेडिट सहकारी संस्थाबाट बचतकर्ताको ठूलो रकम ठगीमा मुछिएका मुख्य अभियुक्त इच्छाराज तामाङकी पत्नी सिर्जना शाक्य तामाङलाई प्रहरीले मंगलवार पक्राउ गरेको छ । 

काठमाडौं जिल्ला अदालतबाट गत पुस २७ गते पक्राउ पुर्जी जारी भई फरार रहेका सहकारीको तत्कालीन लेखा समिति सदस्य तामाङलाई प्रहरीको केन्द्रीय अनुसन्धान ब्यूरोबाट खटिएको टोलीले काठमाडौंस्थित रामशाहपथबाट पक्राउ गरेको हो ।

उनलाई आवश्यक कानूनी कारबाहीका लागि मंगलवारै काठमाडौं जिल्ला अदालतमा पेश गरिएको ब्यूरोका प्रहरी उपरीक्षक श्यामकुमार महतोले जानकारी दिए । उनीहरूको मिलेमतोमा काठमाडौं महानगरपालिका–१३ सोल्टीमोडस्थित सहकारी संस्थामा आकर्षक ब्याजदर दिने लगायत विभिन्न प्रलोभनमा पारी ठूलो संख्याका बचतकर्तालाई रकम जम्मा गर्न लगाई संगठितरूपमा ५ अर्ब ८४ करोड ४० लाख रुपैयाँ ठगी भएको खुल्न आएको थियो । 

सहकारीमा विगत ३ वर्षदेखि बचत गरेको रकमको साँवा तथा ब्याज माग गर्दा नदिइएको भन्दै १ हजार ५३० जना पीडितले ब्यूरोमा ठगी एवं संगठित अपराध कसूरमा जाहेरी दिएका थिए ।  सोही जाहेरीका आधारमा अनुसन्धान सम्पन्न गरी ब्यूरोले गत मंसिर १७ गते संस्थाका पूर्व अध्यक्ष इच्छाराज तामाङसहित १२ जना प्रतिवादीलाई पक्राउ गरी काठमाडौं जिल्ला अदालतमा मुद्दा दायर गरेको थियो ।

हाल प्रतिवादी इच्छाराज तामाङ र केशवलाल श्रेष्ठ पुर्पक्षका लागि कारागारमा छन् ।