स्कुल बस निर्देशिका २०७४ विपरीत ट्राफिक नियम उल्लङ्घन गर्ने विभिन्न स्कुलका सवारी साधनहरूलाई कारबाही तथा सचेत गराउने कार्य काठमाण्डौ उपत्यका ट्राफिक प्रहरी कार्यालय रामशाहपथले थालनी गरेको छ ।

गत साउन ४ गते काठमाडौं उपत्यका ट्राफिक प्रहरी कार्यालय र प्याब्सन, एनप्याबसन, हिसान तथा अभिभावक संघबीच उक्त निर्देशिकालाई पूर्ण पालना गर्ने/गराउने सहमति भएको थियो । 

सोही अनुरूप आइतवार  विभिन्न स्कुलका सवारी साधनहरू चेकजाँच गर्ने क्रममा निर्देशिका विपरीतका कार्यहरू गरेको पाइएको कार्यालयले जनाएको छ ।

यसरी ट्राफिक नियम विपरीत सञ्चालन गरिएका स्कूलबसहरूलाई कारबाही गर्नुका साथै स्कुल व्यवस्थापन समितिलाई समेत जानकारी गराइएको बताइएको छ ।

आगामी दिनहरूमा समेत निर्देशिका विपरीत संचालन हुने स्कुलका सवारी साधनहरूलाई कानून बमोजिम कारवाही गर्ने कार्यलाई निरन्तरता दिइने समेत कार्यालयको भनाइ छ ।