बाँकेको कोहलपुर नगरपालिका वडा नम्बर १४ पार्वतीपुरका एक दम्पतीले मंगलवार रहस्यमय मृत्युवरण गरेका छन् । एक वर्ष अगाडि मात्र विवाह गरेका २५ वर्षीय कृष्ण गडरिया र उनकी श्रीमती २३ वर्षकी अञ्जलीले रहस्यमय मृत्यु वरण गर्नु परेको हो । 

सोमवार साँझ दाजुभाउजुसँग खान खाएर सुतेका उनीहरू मंगलबार बिहान घरबाहिर मृत अवस्थामा भेटिएका थिए । खाना खाएर दाजु–भाउजु भने छतमा सुत्न गएका थिए । उनीहरूकाे मृत्यु स्वाभाविक नदेखिएको प्रहरीले बताएको छ । 

बाँकेका प्रहरी प्रमुख एसपी श्यामकृष्ण अधिकारीले घटना रहस्यमय रहेको बताएका छन् । उनले भने, ‘कृष्णको शरीरमा धेरै रगत लत्पतिएको छ । मुखबाट रगत आइरहेको थियो । दायाँ हातमा सामान्य चोटपटक बाहेक खासै छैन । अञ्जलीको नाडीमा सामान्य चोट छ । श्रीमान-श्रीमतीबीच पनि खासै मनमुटाव भएको प्रारम्भिक अनुसन्धानबाट देखिएको छ ।’ 

प्रहरीका अनुसार घटनास्थलमा हतियार फेला परेको छैन । घरको ढोका खुला थियो । दाजुभाउजु घरको छतमा सुतिरहेका थिए । गर्मी भएकाले आफूहरू छतमा सुतेको उनीहरूले प्रहरीलाई बताएका छन् । घटना शंकास्पद भएको उल्लेख गर्दै दुई किसिमबाट अनुसन्धान अगाडि बढाइएको एसपी अधिकारी बताउँछन् । 

‘घटनामा पारिवारिक कारण पनि हुनसक्छ, बाह्य कारण पनि हुन सक्छ, शव पोष्टमार्टम हुँदैछ, हामी अनुसन्धानको क्रममै छौँ’ एसपी अधिकारीले लोकान्तरसँग भने । बाँकेका प्रहरी प्रवक्ता मधुसुदन न्यौपानेले अनुसन्धान घटनाको कारणको नजिक पुगेको लोकान्तरलाई बताए । 

गडरिया दम्पतीका सन्तान भइसकेका थिएनन् । कृष्णले नजिकैको स्टील उद्योगमा काम गर्दै आएका थिए । अञ्जली घरमै गृहिणी थिइन् । पछिल्लो समय लुम्बिनी प्रदेशमा अपराधका घटना बढ्दै गएका छन् ।