मकवानपुरको हेटौंडा उपमहानगरपालिका–१३ का जगतबहादुर सुनारले आफ्नो जग्गा फिर्ता गराई पाउँ भनी सरोकारवाला निकायसँग सहयोगको अपिल गरेका छन् ।

बुधवार हेटौंडामा पत्रकार सम्मेलन गर्दै उनले बुवा पदमबहादुर सुनारको नाममा रहेको ११ कट्ठा १६ धुर जग्गा २०५४ वैशाख १९ गते हेटौंडा उपमहानगरपालिका–३ बस्ने नियमराज शाक्यबाट पिपलबोटमा व्यवसाय (सुन पसल) को क्रममा ५० हजार रुपैयाँ ऋण सापटी लिई दृष्टि बन्धक रोक्का राख्ने भनी मौखिक सहमति भएको बताए ।

तर मालपोत कार्यालयमा जाँदा नियमराज शाक्यले अनपढ बुवालाई झुक्याई राजीनामाको लिखत लेखाइ बुवालाई पछि रकम फिर्ता गरेपछि जग्गा फुकुवा गर्ने भनी विश्वासमा पारी जग्गा दृष्टिबन्धकी भनी राजीनामा लिखत गरी राखेको पीडित सुनारले बताए । 

सुनारले आफ्नो जग्गा शाक्यको नाममा रहेको २०५९ सालमा मात्र थाहा पाएको सुनाए । ‘त्यसलगत्तै बुवाछोरा २०५९ सालमै शाक्यलाई भेट्न उनकै घरमा धेरैपटक गयौं तर उनले आफूले खरिद गरेको भन्दै थर्काएर पठाए,’ सुनारले भने, ‘२०६३ सालसम्म हामी बुवाछोराले जग्गा फिर्ता गर्न रकम चुक्ता गर्न पटक–पटक प्रयास गर्‍यौं । बुवाको २०६३ सालमै मृत्यु भयो ।’

उनले २०६३ सालमै शाक्यले मालपोत कार्यालयमा गएर राजीनामाको लिखित लेखाइसकेपछि रकम बुझ्नुपर्नेमा व्याजको विषयमा विवाद गर्दै जग्गा फिर्ता नगरी फर्किएको बताए । 

जग्गा हाल पनि आफैंले भोगचलन गर्दै आएको बताउँदै उनले शाक्यसँग पटक–पटक जग्गा नामसारी गर्न अनुरोध गर्दा पनि उल्टै धम्की दिने गरेको बताए । त्यसपछि पनि शाक्यलाई पटक–पटक भेटेर ‘तपाईंले राख्नुभएको धितो राखेको जग्गा मलाईं नामसारी गरिदिनुहोस्, म रकम हिसाब गरी चुक्ता गर्छु’ भनेर भन्दा समेत शाख्यले जग्गा फिर्ता नगरेको उनले बताए ।

उनले आफ्नो परिवारले जग्गामा २०२२ सालदेखि निरन्तर खेती गर्दै आएको बताए । उनले शाक्यको ज्यादतीविरुद्ध जिल्ला अदालतमा जालसाजी मुद्दा दिएको तर हाल विचाराधीन रहँदा शाक्यले विभिन्न व्यक्तिहरू पठाउँदै जग्गा खाली गर्न तथा खेतजोत नगर्न भन्दै धम्की दिने र आफ्नो ज्यान समेत लिन सक्ने धम्की दिएर आफू र परिवारलाई मानसिक तनाव दिइरहेको बताए ।

उनले आफ्नो जग्गा फिर्ता गराई पाउँ भनी हेटौंडा उपमहानगरपालिकाका मेयर मिनाकुमारी लामा, उपमेयर राजेश बानियाँ र जिल्ला समन्वय समितिका प्रमुख ललित घलानलाई कार्यकक्षमा भेटी सहयोगको अपिल गरेका छन् । नियमराज शाक्यलाई बुझ्न फोन सम्पर्क गर्दा फोन उठेन ।