एक चिनियाँ नागरिकसहित ‘अनलाइन ग्याम्बलिङ’मा संलग्न चार जना पक्राउ

काठमाडौं महानगरपालिका–२६ ठमेलबाट विद्युतीय ठगी तथा अनलाइन ग्याम्बलिङमा संलग्न रहेको अभियोगमा चिनियाँ नागरिक ४८ वर्षीय सु सुजीसहित चार जनालाई पक्राउ गरेको छ । बुधवार दिउँसो प्रहरीले नियन्त्रणमा लिएका उनीहरूलाई बिहीवार सार्वजनिक गरिएको हो । 

उक्त स्थानमा अनलाइन ग्याम्बलिङ भइरहेको भन्ने सूचनाको आधारमा प्रहरी वृत्त लैनचौर र जिल्ला प्रहरी परिसर काठमाडौंबाट खटिएको प्रहरीले खानतलासी गर्दा अनलाइन ग्याबलिङका सामग्रीसमेत फेला पारेको थियो । प्रहरीले उनीहरूको साथबाट अनलाइन ग्याम्बलिङ खेलाउन प्रयोग भएका ४ सय ७२ थान मोबाइल, २६ थान ल्यापटप, १ हजार ६२० थान एनसेलको सिमकार्ड, २० थान स्मार्टको सिमकार्ड, १० थान पेनड्राईभ र १ लाख ९० हजार रूपैयाँ मूल्य बराबरको एनसेलको रिचार्ज कार्ड बरामद गरेको छ । 

यस सम्बन्धमा प्रहरीले आवश्यक अनुसन्धान गरिरहेको छ ।