राष्ट्रिय महिला फूटबल टोलीकी सदस्य एवं मिडफिल्डर दीपा न्यौपानेले भारतको केरला महिला लिग खेल्ने भएकी छन् ।

नेपाल पुलिस क्लबकी मिडफिल्डर समेत रहेकी उनी प्रतियोगिताका लागि बुधवार दिउँसो नै भारत प्रस्थान गर्ने कार्यक्रम रहेको छ ।

उनले केरला महिला लिगमा डन बोस्को फूटबल एकेडेमीबाट खेल्नेछिन् । केरेला महिला लिगको च्याम्पियन टोली आइलिगमा छनोट हुनेछ ।

‘प्रतियोगिता खेल्न पाउँदा निकै खुशी छु । यो मेरो विदेशमा पहिलो अवसर समेत हो,’ उनले भने । प्रतियोगितामा नेपाली राष्ट्रिय फूटबल टोलीका सदस्य सावित्रा भण्डारी पनि सहभागी छिन् । उनले गोकुलम केरेला क्लबबाट खेल्ने छिन् ।

प्रतियोगितामा गोकुलमसहित केरला ब्लास्टर, केरेला युनाइटेड लगायत १० टोलीको सहभागिता रहनेछ । केरेला लिगमा डन बोस्को साविक उपविजेता हो । दीपाले २ महिनाका लागि आफूले सम्झौता गरेको बताइन् । उनले आइलिगमा छनोट भए, त्यसमा पनि अवसर मिल्ने सम्भावना रहेको बताइन् ।
    
साउन २५ गतेदेखि शुरू भएको प्रतियोगिताको पहिलो खेलमा गोकुलम केरेला र केरेला युनाइटेडबीच हुनेछ । डन बोस्कोले आफ्नो पहिलो खेलमा बिहीवार लड्र्स पिआरविरुद्ध खेल्नेछ ।