काठमाडौं उपत्यका खानेपानी लिमिटेड (केयुकेएल)मा कार्यरत सिनियर प्लम्बर गणेशबहादुर खुलाल ५ हजार रुपैयाँ घुस रकमसहित पक्राउ परेका छन् । अख्तियार दुरुपयोग अनुसन्धान आयोगको केन्द्रीय कार्यालयको टोलीले उनलाई मंगलवार सेवाग्राहीसँग लिएको घुस रकमसहित केयुकेएलको महांकाल शाखा कार्यालयबाट पक्राउ गरेको हो । 

झापा गौरीगन्ज ५ घर भई हाल बूढानीलकण्ठ ११ कपनटार बस्ने उनले धारा जडानका लागि सेवाग्राहीसँग घुस लिएका थिए । धारा जडानका लागि आवश्यक सबै प्रक्रिया पूरा गर्दा पनि खुलालले हैरानी दिएपछि सेवाग्राहीको सूचनाका आधारमा अख्तियारको टोलीले उनलाई पक्राउ गरेको हो । उनकाे साथबाट प्रहरीले सेवाग्राहीसँग लिएकाे घुस रकम बरामद गरेकाे छ ।