जर्मनी, १४ साउन —गैरआवासिय नेपाली संघ (एनआरएनए) युरोपको दशौं क्षेत्रीय बैठक तथा आठौ महिला सम्मेलन जर्मनीको फ्रयाङ्गफुटमा सुरु भएको छ ।
‘युरोपमा नेपाली एकता,समृद्ध नेपालको आवश्यकता’ नाराका साथ शनिबारदेखि सुरु बैठक तथा महिला भेलाको जर्मनीका लागि नेपाली राजदूत रमेश प्रसाद खनालले पानसमा बत्ती बालेर उद्धघाटन गरे । भेला आइतबारसम्म चल्नेछ ।
कार्यक्रममा एनआरएनएका संस्थापक अध्यक्ष डा.उपेन्द्र महतो, एनआरएनका अध्यक्ष शेष घले, पूर्व अध्यक्ष जीवा लामिछाने लगायत एनआरएनएका अभियान्ताहरुको सहभागिता रहेको छ ।
बैठकलाई सम्बोधन गर्दै एनआरएनएका संस्थापक अध्यक्ष डा.उपेन्द्र महतोले २१ औ शताब्दी व्यावयायिक युग भएपनि पैसालेमात्रै सबै चिज हासिल गर्न नसकिने भन्दै नेपालको सन्दर्भमा पैसा नभई सक्षम नेतृत्व चाहिएको बताए ।
यस्तै राजदूत खनालले देश निर्माणमा सहयोग गर्न आग्रह गरे भने एनआरएनएका केन्द्रीय अध्यक्ष शेष घलेले नेपालको विकासमा सघाउन आफूहरु तयार रहेको बताए ।
कार्यक्रममा एनआरएनए स्पेनका अध्यक्ष्ँ चिन्तामणी सापकोटाले युरोपमा नेपालीहरुको समस्या तथा चुनौती र नेपालको समृद्धिका लागि पर्यटन भित्र्याउन नेपालबाट सिधा हवाइ उडानका लागि पहल गनुपर्ने धारणा राखे ।
बैठकको मुख्य एजेण्डा एनआरएनएको निर्माणधीन भवनको लागि आवश्यक रकम दुई करोड रुपैया संकलन गर्ने लक्ष्य रहेको छ । युरोपेली बैठकमा युरोपभरीका एनआरएनएका अध्यक्ष तथा आईसिसि सदस्यहरुको सहभागिता रहेको छ ।
बैठकमा आउदो अक्टोबरमा काठमाण्डौमा हुन गइरहेको एनआरएनएको अन्तर्राष्ट्रिय अधिबेशनलाई मध्य नजर गर्दै बैठकमा विभिन्न देशबाट आएका प्रतिनिधिहरुले आ–आफ्नो चुनावी अभियानलाई केन्द्रित गरेर लभिङको सुरुवात समेत गरेका छन् ।
युरोप संयोजक कूल आर्चायको सभापतित्वमा भएको कार्यक्रममा एनआरएनए जर्मनीका अध्यक्ष नवराज रोस्याराले स्वागत मन्तब्य ब्यक्त राखेका थिए ।
